፨ ፨ ፨ ፨ ፨
አዲስ አበባ | ሰኔ12 2016| NBC ETHIOPIA- በርካቶች የሀብት ማማ ተቆናጠው ኑሮን ሲያጣጥሙ ብዙሃኑ ደግሞ ከድህነት ወለል በታች በስቃይ ኑሮን ይገፋል።ይህ የዓለም ሁለት ገጽታ ነው፡፡ ድህነት ያስመመረራቸው የተሻለ ኑሮን ፍለጋ ሀብታም ወደሚባሉት ወደተለያዩ የአለም አገራት ያቀናሉ፡፡ አገራትም በየዓመቱ ባላቸው የምጣኔ ሀብታዊ እድገት መሰረት ለኑሮ ውድ እና ርካሽ ተብለው ደረጃ ይወጣለቸዋል።
ታዲያ ከሰሞኑም ሜርሴር የኑሮ ዋጋ ዳሰሳ ባደረገው ጥናት መሰረት በየዓመቱ በዓለም ላይ የኑሮ ውድነት የሚስተዋልባቸውን እና በአንጻሩ ደግሞ ለመኖር ርካሽ የሆኑ ከተሞችን በጥናት ላይ ተመስርቶ ዝርዝራቸውን ይፋ አድርጓል።
የዚህ ዓመቱ ጥናት በ226 የዓለማችን ከተሞች ላይ የተደረገ ሲሆን መሰረታዊ የሚባሉ የኑሮ ጥያቄዎችን መነሻ አድርጎ ስለመከናወኑ ተገልጿል።
በሪፖርቱም መሰረት የአካባቢው መጓጓዣ፣ ምግብ፣ አልባሳት፣ የቤት እቃዎች እንዲሁም መዝናኛዎች ጨምሮ ከ200 በላይ ዕቃዎችን በማነፃፀር የዋጋ ሁኔታን ታሳቢ አድርጓል ተብሏል።
በጥናቱም መሰረትም ሆንግ ኮንግ በፈረንጆቹ 2024 ለውጭ አገር ሠራተኞች በጣም ውድ ከተማ ሆናለች፡፡ ከተማዋ ከዚህ በፊት በተደረገ ጥናትም ለውጭ አገር ሠራተኞች ውድ ከተማ የነበረች ሲሆን ይህ ለሁለተኛ ጊዜ ነው ይላል ጥናቱ፡፡

እ.ኤ.አ. በ2022 እና 2023 አመታዊ ዝርዝር ቀዳሚ የነበረችው የእስያ ከተማ፣ ሲንጋፖር ሆንግ ኮንግ በመከተል በሁለተኛ ደረጃ ላይ ተቀምጣለች።
የስዊዘርላንድ ከተሞች የተቀሩትን ደረጃዎች የያዙ ሲሆን ዙሪክ፣ ጄኔቫ፣ ባዝል እና በርን እንደ ቅደም ተከተላቸው ከሶስተኛ፣ እስከ ስድስተኛ ደረጃን ይዘዋል።
ኒውዮርክ ሰባተኛ ደረጃን በመያዝ ውዷ የአሜሪካ ከተማ ስትሆን የእንግሊዝ ዋና ከተማ ለንደን ደግሞ ባለፈው አመት ከነበረችበት የ17ኛ ደረጃ ወደ ስምንተኛ ደረጃ ከፍ ብላለች ተብሏል። ናሶ፣ ባሃማስ ዘጠነኛ ደረጃን የያዘች ሲሆን ሎስ አንጀለስ 10ኛ መሆን ችላለች።
በሪፖርቱ መረጃ መሰረት በተለይ በከፍተኛ ደረጃ ላይ በተቀመጡ ከተሞች የኑሮ ውድነት እንዲጨምር ካደረጉ ምክንያቶች መካከል ውድ የቤት ገበያ ፣ የትራንስፖርት፣ የእቃ እና የአገልግሎት ዋጋ መጨመር ናቸው።
በከተማ ደረጃ አሰጣጥ ሂደቱ ላይ በዋናነት የመኖሪያ ቤት ዋጋን መሰረት አድርጓል ሲል ጥናቱ አመላክቷል።በዚሁም መሰረት ከተሞች ባላቸው የቤት ኪራይ ዋጋ ከፍተኝነት ምክንያት የውጭ አገር ሰራተኞች ከገቢያቸው ከፍተኛ መጠን ያለውን ለኪራይ ስለሚያውሉት ለሎሎች ወጪዎች የሚቀራቸው ገንዘብ አነስተኛ ስለመሆኑም በጥናቱ ተመላክቷል፡፡

በፈረንጆቹ 2023 እና 2024 መካከል፣ በአለም ዙሪያ የመኖሪያ ቤት ዋጋ ብዙ ተለዋዋጭነት የነበረው እንደሆነ እና የመኖሪያ ቤት ኪራይ ዋጋ በከተሞች መካከል በእጅጉ መለያየቱን ሪፖርቱ አመልክቷል።።
በተጨማሪም የዋጋ ግሽበት እና የምንዛሪ ተመን መዋዠቅ በአለም አቀፍ ሰራተኞች ደመወዝ እና ቁጠባ ላይ ቀጥተኛ ተጽእኖ ማሳደሩ ተጠቁሟል።
ይፋ የተደረገው ዝርዝሩ ካለፈው ዓመት አገራቱ ደረጃ ጋር ሲነጻጸር ብዙ መቀያየሮችን ያሳየነው ተብሏል።ጥናቱ በፈረንጆቹ 2024 በአሜሪካ ያለው የኑሮ ውድነት በጉልህ ያሳየ ነው ተብሏል። ሰባት የአሜሪካ ከተሞች በውድነት እስከ 20 ባለው ደረጃዎች ውስጥ ተካተዋል።

በኑሮ ውድነት ዝቅተኛውን ደረጃ ወይንም ለወጭ አገር ሰራተኞች ለመኖር ቀላል ከሆኑት መካከል የፓኪስታን ከተማ ኢስላማባድ እና የናይጄሪያ ሌጎስ እና አቡጃ ይገኙበታል፡፡ሆኖም፣ ይህ በከፊል “የምንዛሪ ዋጋ በመቀነሱ” የተከሰተ ነው ተብሏል።
በየከተሞቹ ያለውን የኑሮ ውድነት ደረጃ ሲለይ ግምት ውስጥ ከገቡት 200 ምርቶች መካከል እንቁላል፣ የወይራ ዘይት እና ቡና ዋጋ ተጠቃሽ ተደርገዋል።የኑሮ ውድነት ተግዳሮቶች በዓለም አቀፍ ድርጅቶች እና በሰራተኞቻቸው ላይ ከፍተኛ ተጽዕኖ እያሳደረ ይገኛል ሲል የሜርሴር የኑሮ ዋጋ ዳሰሳ ጥናት አመላክቷል ሲል ሲ ኤን ኤን ይዞት በወጣው መረጃ አመላክቷል፡፡
በ-ሀይማኖት ወርቁ












