፨ ፨ ፨ ፨ ፨
አዲስ አበባ | ሚያዚያ 15 2016| NBC ETHIOPIA- ከጊዜ ወደ ጊዜ በሰው ልጆች ህይወት ውስጥ ያለው ወሳኝ ሚና እየጨመረ የመጣው አርቴፊሻል ኢንተለጀንስ(ሰው ሰራስ አስተውሎት) ተጽእኖው በተለያዩ ዘርፎች ጎልቶ እየታየ ይገኛል፡፡ በቴክኖሎጂው ዘርፍ የተሰማሩ የአለማችን ትላልቅ ኩባንያዎችም አዳዲስ የአርቴፊሻል ኢንተለጀንስ ሞዴሎችን እያስተዋወቁ ነው፡፡ ከሰሞኑም የማይክሮሶፍት ኩባንያ ተመራማሪዎች አዲስ የአርቴፊሻል ኢንተለጀንስ ሞዴልን ለቴክኖሎጂው ዓለም እንካችሁ ብለዋል፡፡

ተመራማሪዎቹ ይፋ ያደረጉት አዲስ የኩባንያው ሰው ሰራሽ አስተውሎት ሞዴል ቫሳ 1 የተሰኘ ሲሆን የሰዎችን የፊት ፎቶዎች ወደ ተንቀሳቃሽ ምስል የሚለውጥ ነው ተብላል፡፡
ሞዴሉ የአንድ ሰው ፊት ምስል እና የአንድ ሌላ ሰው የተቀዳ ድምፅን በማዋሃድ በፎቶ ላይ ያለውን ሰው ንግግር በቀጥታ አሊያም ልክ ራሱ እያወራ እንደሆነ የሚያስመስል ተንቀሳቃሽ ምስል ይፈጥራል ነው የተባለው።
ማይክሮሶፍት ኩባንያ በይፋዊ ድረ-ገጽ እንዳሰፈረው VASA ህይወት የሚመስሉ የምናባዊ ገጸ-ባህሪያትን ማራኪ እይታ ለመፍጠር የሚያስችል ማዕቀፍ ነው ብላል፡፡ እንዲሁም የፕሪሚየር ሞዴል VASA-1 ትልቅ የፊት ገጽታ እና የተፈጥሮ ጭንቅላት እንቅስቃሴዎችን ከመያዝ በተጨማሪ ከድምጽ ጋር የሚመሳሰሉ የከንፈር እንቅስቃሴዎችን መስራት ያስችላል ሲል ጠቁማል፡፡ ይህም ምንም እንከን እንዳይኖረውና በትክክል በፎቶ ላይ ያለው ሰው እያወራ እንደሆነ ለማሳመን ያስችላል ብላል ኩባንያው፡፡

የኩባንያው ተመራማሪዎችም በ16ተኛው ክፍለ ዘመን በእውቁ ሰአሊ ሊዮናድዶ ዳቪንቺ የተሳለውን የሞናሊዛ ስዕል አዲሱን ሞዴል ማሳያ አድርገው አቅርበዋል፡፡ በዚህም ቪዲዮን በተዋናይ አን ሃታዌይ የተቀነቀነቀው አስቂኝ ራፕ ሞናሊዛ ስታቀርብ ያስመለክታል፡፡
ከማይክሮሶፍት ለመጣው አዲስ ሰው ሰራሽ አስተውሎት ቴክኖሎጂ ምስጋና ይግባውና ሞና ሊዛ አሁን ከፈገግታ ባሻገር መስራት መቻሏን አለም ኣቀፍ ሚዲያዎች ገልፀዋል፡፡ ሞናሊዛ ራፕ ስታደርግ የሚያሳየው ተንቀሳሽ ምስልም መጀመሪያ ላይ በማይክሮሶፍት ይፋዊ ድረ-ገጽ የተለጠፈ ሲሆን በአሁኑ ሰአት በተለያዩ ማህበራዊ ሚዲያዎች ተሰራጭቶ መነጋገሪያ ሆናል፡፡
ይህ ተንቀሳቃሽ ምስል በ X ከተጋራበት ጊዜ ጀምሮ ከሰባት ሚሊዮን በላይ እይታዎችን ማግኘት የቻለ ሲሆን አሁንም የእይታው ቁጥሩ እየጨመረ ነው፡፡ ሰዎችም በአዲሱ የሰው ሰራሽ አስተውሎት ሞዴል ላይ ሀሳባቸውን እያጋሩ ይገኛል፡፡ አስተያየታቸውን በ X ያሰፈሩት አንዳንዶቹ ቴክኖሎጂውን እያደነቁ እና የማይታመን ሲሉ በተቃራኒው ለሀሰተኛ ምስሎች መበራከት ከፍተኛ ሚና ይሆረዋል የሚሉም አልጠፉም፡፡ ፎቶን ተጠቅሞ ወደ የአፍ እና ጭንቅላት እንዲንቀሳቀስ የማድረግ ቴክኖሎጂ ከዚህ ቀደም በRunway and Nvidia በተባሉ ተቋማት የተሞከረ ሲሆን ማይክሮሶፍት ያስተዋወቀው AI ግን የተሻላ ለእውነታ የቀረበ ይመስላል ተብሏል፡፡

ከቅርብ ጊዜያት ወዲህ የሰው ሰራሽ አስተውሎት ቴክኖሎጂ እጅግ እየዘመነ ብሎም እየረቀቀ የመጣ ሲሆን ድምጽ በማስመሰል ማጭበርበር ሊስፋፋ እና የቪዲዮ ምስሎችን በመፍጠር የሐሰት ዜና እንዲስፋፋ በር እየከፈተም እንደሆነ ብዙ የዘርፉ ባለሙያዎች ይተቻሉ፡፡ ሰዎች የቪዲዮ ይዘትን በመመልከት ብቻ እውነተኛውን ሰው ለመናገር ይቸገራሉም ነው የሚሉት፡፡ ይህም በኢንተርኔት ላይ ከፍተኛ መጠን ያለው ማጭበርበር ያመጣል ሲሉም ይሞግታሉ፡፡
በ AI ዘመን እምነትን ወደ ነበረበት ለመመለስ እና ለማጠናከር አዳዲስ ዘዴዎችን በማምጣት ፈር ቀዳጅ ማድረግ በጣም አስፈላጊ ነው” ሲሉም አስተያየት ሰጪዎች ሀሳባቸውን አጋርተዋል፡፡
ማይክሮሶፍት ሰው ሰራሽ የማሰብ ችሎታው ለትምህርት ዓላማዎች ወይም ለሰዎች ምናባዊ ጓደኞችን ለመፍጠር ሊያገለግል ይችላል ብሏል – ነገር ግን አዲስ ያስተዋወቀው ቴክኖሎጂ አደጋ ሊያስከትል እንደሚችል አስጠንቅቋል ።
መሳሪያው ሰዎችን ለማስመሰል አላግባብ ጥቅም ላይ ሊውል እንደሚችል ያመነ ሲሆን መተግበሪያ በኃላፊነት እና በጥቅም ላይ እንደሚውል እስካልተረጋገጠ ድረስ አዲሱን ሞዴል ለመልቀቅ እቅድ የለንም ሲል ገልፃል፡፡











