፨ ፨ ፨ ፨ ፨
አዲስ አበባ | ሚያዚያ 03፣ 2016| NBC ETHIOPIA-በፈረንጆቹ ታህሳስ 25 1878 በሲዊዘርላድ ተወለደ፡፡ ለቤተሰቡ 2ኛ ልጅ የሆነው ሉይስ ጆሴፍ ቼቭሮሌት፡፡ ዛሬ ላይ በአለም አቀፍ ደረጃ እውቅናን ያተረፈው የጀነራል ሞተርስ አምራች ድርጅት ቼቭሮሌት መስራች ነው፡፡ እንዲሁም ሉይስ ጆሴፍ አሜሪካዊ የመኪና ውድድር ተወዳዳሪ፣ መካኒክና ስራ ፈጣሪ ነው፡፡ ሉይስ ጆሴፍ ቼቭሮሌት ከተወለደባት ስዊዘርላንድ በ1887 ከአባቱ ጋር ወደ ፈረንሳይ ኑሮን ለማቅናት ተጓዙ፡፡
ወጣቱ ሉይስ ጆሴፍ ወደ ፈረንሳይ ካቀና በኋላ ከ1889 እስከ 1899 በተለያዩ የመካኒክ ሱቆች ውስጥ ተቀጥሮ ሰራ፡፡ ከዚያም በ1900 መካኒክ ሆኖ ለመሥራት ወደ ሞንትሪያል፣ ኩዊቤክ፣ ካናዳ ተሰደደ። በዛም አንድ አመት ቆይታ በማድረግ በቀጣዩ ዓመት ወደ ኒው ዮርክ ሲቲ ተዛወረ። በዚያም ለአንድ ስዊዘርላንዳዊ ኢንጂነሪንግ ኩባንያ ለአጭር ጊዜ ከሠራ በኋላ ወደ ብሩክሊን የፈረንሳይ መኪና አምራች ደ ዲዮን ቡተን ተዛወረ።

እ.ኤ.አ. በ1905 ቼቭሮሌት የመጀመሪያውን የመኪና ውድድር ካሸነፈ በኋላ ከ1909 እስከ 1919 ድረስ አሥር የብሔራዊ ሻምፒዮና ውድድሮችን በብቃት ማሸነፍ ችሏል፡፡ በ1907 በፊላደልፊያ በሚገኘው አውቶካር ኩባንያ ተቀጥሮም ይሰራ ነበር፡፡ በተለያዩ የሕይወት መስመሮቹ ከመኪና ጋር የተገኛኙ ስራዎችን ይሰራ የነበረው ሉይስ ጆሴፍ በስራ ላይ በነበረባቸው ጊዜያት የመኪና ዲዛይን ተምሯል:: የራሱንም ሞተር ዲዛይን አድርጓል፡፡ በመሆኑም ህዳር 3 ቀን 1911 የቼቭሮሌት መኪና አምራች ኩባንያን ከወንድሙ አርተር ቼቭሮሌትና ከጓደኛው ዊልያም ሲ ዱራንት ጋር በመሆን መሰረተ፡፡ ታዲያ ሉይስ ጆሴፍ ከወዳጆቹ ጋር በመሆን ችሎታቸውን አጣምረው ቼቭሮሌት ሞተር ኩባንያ ፈጠሩ። ቼቭሮሌት በሚል ስያሜ የተሰጠው ተሸከርካሪ ወደ ገብያ ከገባ በኋላ 2,150 ዶላር በመሸጥ በመቀጠልም ዋጋው ከፍ ብሎ 3,000 ዶላር በመሸጥ በሁለት ዓመታት ውስጥ 16,000 ተሽከርካሪዎችን ሽጠ 1.3 ሚሊዮን ዶላር ትርፍ ማምጣት ቻለ፡፡
ቢሆንም ግን ሉዊስ ቼቭሮሌት በመኪናው ዲዛይን ከዱራንት ጋር ልዩነት ነበረው፡፡ በዚህም በ1915 ለዱራንት በኩባንያው ውስጥ ያለውን ድርሻ በመስጠት በካናዳ የሚገኘውን ቼቭሮሌትስን ኩባንያ መገንባት ጀመረ።
በቀጣዩ ዓመት የ ቼቭሮሌት ሞተር ኩባንያ ወደ ጄኔራል ሞተርስ ድርጅት ተቀላቅሎ ወደ ስራ ገባ፡፡
ቼቭሮሌት ዛሬ ላይ በአሜሪካ በጄኔራል ሞተርስ አውቶሞቢል አምራችነት የሚታወቅ ትልቅ ካምፓኒ ነው፡፡
ሉይስ ጆሴፍ ቼቭሮሌት እውቀቱን ለሌሎች አምራቾች ያጋራ እንደነበር ግለ ታሪኩ ይነግረናል፡፡ በብዙ ፈተና ውስጥ ያለፈው ሉይስ ከተሸከርካሪዎች ባለፈ አውሮፕላኖችንና የአውሮፕላን ሞተሮችን ዲዛይን ይሰራ እንደነበር ነው ታሪኩ የሚያስረዳው፡፡ የቼቭሮሌት የግል መፈክር “ተስፋ አትቁረጥ!” የሚል ነበርና በሄደበት በገባበት ቦታ ሁሉ ተስፋ ባለመቁረጥ የወደደውን ሁሉ ለማሳካት ይታገል ነበር፡፡

ሉይስ ጆሴፍ ቼቭሮሌት ባለትዳርና የሶስት ልጆች አባት የነበረ ሲሆን ከብዙ ድካምና ስራ በኋላ ወደ መካኒክ ስራው ተመልሶ መስራትን ቀጠለ፡፡ ብዙ ውጣ ውረድን ያሳለፈው ሉይስ ጆሴፍ ሰኔ 6 ቀን 1941 በልብ ድካም ከዚህ አለም በሞት ተለየ፡፡
ሉይስ ጆሴፍ ቼቭሮሌት በህይወት በነበረበት ጊዜ በተለያዩ ወድድሮች በማሸነፍ ዝናን ተከናነምቧል፡፡ በዚህም Automotive Hall of Fame ፣National Sprint Car Hall of Fame ፣ International Motor sports Hall of Fame ፣ እና Motorsports Hall of Fame of America የሚሉ ሽልማቶችን ተቀብሏል፡፡
በብዙ የጀግንነት ታሪክ የሚታወቀው ለብዙዎች ተስፋ ባለመቁረጥ ምሳሌ የሆነው አለምን ማስደነቅ ስራን መስራት የቻለው ይህ ሰው ጅማሬው በነበረበት የመካኒክ ስራ ላይ ከነበረበት ወደታች ወርዶ ህይወቱ ማለፉ ለብዙዎች አሳዛኝ ክስተት ነው፡፡












