አዲስ አበባ | መጋቢት 11፣ 2016| NBC ETHIOPIA የረመዳን ወር ጾም በዓለም ዙሪያ ባሉ ሙስሊሞች የቀን መቁጠሪያ ውስጥ ትልቅ ስፍራ ይሰጠዋል፡፡
ይህንን ጊዜ ሊገልጹ የሚችሉ የተለያዩ ኪነ ጥበባዊና ስነ ጽሁፋዊ ስራዎች በስፋት ይስተዋላሉ፡፡ከነዚህም መካከል የረመዳን ወር ሲነሳ ተያይዘው ከሚታወሱ ነገሮች መካከል አንደኛው ፋኖስ ነው፡፡

ፋኖስ በአሁኑ ጊዜ በመላው አለም በተለይም ደግሞ በመካከለኛው ምስራቅ በረመዳን ጊዜ እንደ ቤት ማስዋቢያነት ያገለግላል፡፡
ከዚህም ባሻገር በዚህ ወቅት በርካታ ቁጥር ያላቸው የስጦታ ካርዶችና ማስታወቂያዎች ላይ የፋኖስን ምስል ማኖር ልምድ ከሆነ ሰነባበቷል፡፡
ፋኖስ ከሌሎች ጊዜያት በተለየ በረመዳን ወቅት የተለየ ቁርኝት ያለው ሲሆን ለዚህም ታሪካዊ ዳራ እንዳለው ይነገራል፡፡
የፋኖስ አመጣጥን የሚያስረዱ የተለያዩ ታሪኮች ቢኖሩም ሁሉም ታሪኮች ግን ወደ ካይሮ የሚያመሩ ናቸው።
ከፋኖስ አመጣጥ ጋር በተያያዘ በስፋት የሚታወቀው ታሪክ የሚጀምረው በ969 ኤዲ ነው፡፡
የወቅቱ በካይሮ ይገኙ የነበሩ ሰዎች የአል ሙኢዝ ሊ-ዲኒ ላህ አል ፋቲ በሌሊት መምጣትን ከመጠባበቅ ጋር የተያያዘ ነው፡፡
የወቅቱ የሀገሪቱን ገዢ አል ሙኢዝ ሊ-ዲኒ ላህ መምጣትን ተከትሎ ለገዢው ብርሃን በማብራት ያደረጉት አቀባበል ለፋኖስ በመነሻነት የሚቀርብ ስለመሆኑ በርካታ የታሪክ ምሁራን ያስረዳሉ፡፡
መንገዱን በፋኖሶች ብርሃን ለማድመቅ ህብረተሰቡ ሻማና ፋኖሶችን በመያዝ ማለፊያውን እንዲያበራ ትዕዛዝ ተላልፎለት ነበር፡፡
ከዚያም በዚህም የፋኖሶች ውበትና ብርሃን ድምቀት የተደነቀው አል ሙኢዝ ሊ-ዲኒ ላህ በከተማይቱ ውስጥ ሲዘዋወር ህዝቡ በየምሽቱ ፋኖሶችን እንዲያበሩለት ትእዛዝ ማስተላለፉ ይነገራል፡፡
ሌላኛው ከፋኖስ ጋር ተያይዞ የሚቀርበው ታሪክ የካይሮ ሰዎች ጨረቃን ለማየት ሞካታም ወደ ተባለ ኮረብታ ገዥያቸውን ከመሸኘት ጋር የተቆራኘ ስለ መሆኑ የታሪክ አዋቂዎች ይናገራሉ፡፡
በአሮጌ የካይሮ መግቢያ በሮች ማለትም ባብ ኤል-ናስር ባብ ኢል-ፈቱህ እና ባብ ኤል-ዳሃብ አልፈው በመንገድ ላይ ህጻናት ፋኖሶችን ይዘው የረመዳንን ወር መግቢያ ይጠባበቁ ነበር፡፡
ከነዚህ የመነሻ ታሪኮች ባሻገር የፋኖሶቹ ታሪክ የሚጀምረው በ10 ኛው ክፍለ ዘመን እንደሆነ የሚናገሩ የታሪክ ሰዎችም አሉ፡፡
በወቅቱ የነበረው ሀገረ ገዥ ሴቶች ዓመቱን ሙሉ ቤታቸውን ለቀው እንዳይወጡ ክልከላ አደረገ፡፡
ይህ በሴቶች ላይ የተጣለው ክልከላ ታዲያ ፀሀይ ከጠለቀች በኋላ ለሶላት መስጅድ እንድትገኝና ዘመዶቿን ብሎም ጎረቤቶቿን እንድትጎበኝ በረመዷን ወር ተነሳ፡፡
ይህ እግድ ይነሳ እንጂ እንደ ቅድመ ሁኔታ የተቀመጠው ፋኖስ ነበር፡፡ማንኛዋም ሴት በምሽት መንቀሳቀስ የምትችለው መንገዳቸውን ለማብራትና አንዲት ሴት በዛ መንገድ እያለፈች መሆኑን ለወንዶች ለማሳወቅ ፋኖሶችን በያዙ ወንዶች ልጆች ታጅባ ሊሆን እንደሚገባ ታወጀ፡፡

ከጊዜ በኋላም የግብፅ ፋኖሶች በየአካባቢው ተሰራጭተው በሌሎች በርካታ ከተሞች የረመዳን ባህል ሆነዋል።በተለይም ደግሞ በደማስቆ፣ አሌፖና ኢየሩሳሌም በስፋት አገልግሎት ላይ ይውላል፡፡
በወቅቱ በፋኖሶች ውበት የተገረመው የሀገሪቱ ገዥ የእጅ ጥበብ ባለሙያዎችን በንግድ ስራ እንዲሰሩ ትዕዛዝ ያስተላለፈ ሲሆን ከዚህም ባሻገር ሰዎች በሮቻቸው ላይ መብራቶችን እንዲሰቅሉ የሚያስገድድ አውጆም ነበር፡፡
በዚህ ምክንያት የፋኖሶች ኢንዱስትሪ እያደገ ሄዶ ፋኖሶች በሁሉም ቅርጾች፣ ቀለሞችና መጠኖች በስፋት መመረት ጀመሩ፡፡
በአሁኑ ወቅት በስፋት የሚመረቱት ዘመናዊዎቹ ፋኖስ ከረመዳን ጋር ቁርኝት ካላቸውና እንደ ጨረቃና ኮከብ ሁሉ መገለጫ ለመሆን ችሏል፡፡
በተከበረው የረመዳን ወርም በርካቶች ቤታቸውን በቀለማት ባሸበረቁ ፋኖስዎች ያበራሉ።












