አዲስ አበባ፣ ነሐሴ 23/2015፣ NBC ETHIOPIA- ዶክተር ቆስጠንጢኖስ የኢትዮጵያ ብሪክስ አባልነት ጥያቄ ተቀባይነት ማግኘትን አስመልክተው ለኢትዮጵያ ፕሬስ ድርጅት በሰጡት አስተያየት እንዳሉት፤ ኢትዮጵያ የአፍሪካ ኅብረት መሥራችና መቀመጫ፣ የተባበሩት መንግሥታ ድርጅት የአፍሪካ ኢኮኖሚክ ኮሚሽን መቀመጫና በዓለም ላይ ሁለተኛዋ የዲፕሎማሲ ማዕከል ስለሆነች ከታሪኳ አንጻር ብሪክስን መቀላቀሏ ተገቢነት ያለው ነው።

የጥምረቱ አባል መሆኗም በአባል ሀገራት መካከል በሚኖር መስተጋብር የኢንቨስትመንት ፍሰቱን ለመጨመርና ኢኮኖሚያዊ እድገቷን ለማፋጠን የሚያግዝ ነው ብለዋል።
የብሪክስ አባል ሀገራት በቴክኖሎጂ የበለጸጉ፣ ከፍተኛ እድገት ያስመዘገቡና በፍጥነት በማደግ ላይ ያሉ ብሎም ምርታቸውን በስፋት ወደ ሌሎች ሀገራት በመላክ የሚታወቁ ናቸው ያሉት ዶክተር ቆስጠንጢኖስ፤ ኢትዮጵያ ያላትን ከፍተኛ የእርሻ መሬትና የውሃ ሀብት በመጠቀም የኢንቨስትመት አጋርነቷን በማጠናከር ምርታማነትን ለማሳደግና ወደ ውጭ በመላክ ከፍተኛ ገቢ ማግኘት የሚያስችል አቅም መፍጠር ያስችላል።
በዚህ ሂደት በሚኖሩ ትብብሮችም በቴክኖሎጂ ሽግግር በኩል ትልቅ አቅም የሚፈጥርለት ዕድል እንደሚኖር ጠቅሰዋል።
የብሪክስ አባል ሀገራት የጋራ መገበያያ ገንዘብ ለመፍጠርና በራሳቸው ገንዘብ ለመገበያየት ጥረት እያደረጉ መሆኑን አስታውሰው፤ ቻይናና ሕንድ በአሁኑ ጊዜ ይህን ግብይት ማከናወን ጀምረዋል። ይህም ለኢትዮጵያ በዶላር ላይ ያላትን ጥገኝነት ለመቀነስና በራሷ ገንዘብ መገበያየት እንድትችል በማድረግ ትልቅ ጥቅም የሚሰጥ ነው ማለታቸውን ኢፕድ ዘግቧል ።
YouTube – https://www.youtube.com/@NBCETHIOPIA
TikTok – https://www.tiktok.com/@nbcethiopia
Facebook -https://www.facebook.com/ethiopiannbc












