
አዲስ አበባ ሐምሌ 4 ፤ 2015 | NBC ETHIOPIA- ኢትዮጵያ ከጋና ጋር ያላትን ለረጅም ጊዜ የቆየ የሁለትዮሽ ግንኙነት ለማጠናከር አበክራ እንደምትሰራ በጋና የኢትዮጵያ አምባሳደር ተፈሪ ፍቅሬ ገለጸዋል።
አምባሳደር ተፈሪ ለጋና ፕሬዝዳንት ናና አኩፎ አዶ የሹመት ደብዳቤያቸውን ያስገቡ ሲሆን የፕሬዝዳንት ሳህለወርቅ ዘውዴን የሰላምታ መልዕክት አስተላልፈዋል።
በተጨማሪም አፄ ኃይለ ስላሴ እና ፕሬዝዳንት ክዋሜ ንክሩማ የአፍሪካን ሕብረት በመመስረት እንዲሁም የፓን አፍሪካኒዝም ንቅናቄን በማነሳሳት በመላው አፍሪካ ከቅኝ አገዛዝ ነፃ ለመውጣት በተደረገው ትግል የተጫወቱትን ወሳኝ ሚና አንስተዋል።
ሁለቱ አገራት በዴሞክራሲ ስርዓት ግንባታ፣ በሰላምና ደህንነት፣በማዕድን ኢንዱስትሪ እና በመድኃኒት(ፋርማሲዩቲካልስ) ዘርፍ ላይ የልምድ ልውውጥና የእውቀት ሽግግር ማድረግ ላይ ትኩረት ሰጥቶ መስራት እንደሚገባም ነው አምባሳደር ተፈሪ የተናገሩት።
የጋና ፕሬዝዳንት ናና አኩፎ አዶ የኢትዮጵያና የጋናን ግንኙነት የበለጠ ለማጠናከር እንዲሁም አምባሳደሩን በጋና ቆይታቸው ለመደገፍ ቁርጠኛና ዝግጁ መሆናቸውን እንዳረጋገጡ የውጭ ጉዳይ ሚኒስቴር አስታውቋል።
እንደ ኢዜአ ዘገባ ኢትዮጵያ እና ጋና ስድስት አስርት ዓመታትን የተሻገረ ዲፕሎማሲያዊ ግንኙነት አላቸው።
YouTube – https://www.youtube.com/@NBCETHIOPIA
TikTok – https://www.tiktok.com/@nbcethiopia











