፨ ፨ ፨ ፨ ፨
አዲስ አበባ | ግንቦት 14 2016| NBC ETHIOPIA-የምንወዳቸውን ሰዎች ዳግም መልሰን ማግኘት አለመቻላችን ሞት በብዙዎች ለመፈራቱ ምክንያት ነው፡፡ ከህይወት በኋላ ወዳለው ዓለም የሄዱ ሰዎችን በአንዳች ጥበብ ማግኘት መቻል የማጣቱ ስሜት የሚፈጥረውን ህመም በብዙ እንደሚቀንሰው የስነልቦና ባለሙያዎች ይናገራሉ፡፡
ጀምስ ቭላሆስ የሚወዳቸው አባቱ የመጨረሻ ደረጃ በደረሰ የሳንባ ካንሰር ስለመጠቃታቸው አስደንጋጭ ዜና የደረሰው በጎርጎሮሳውያኑ 2016 ነበር፡፡ እሱና ወንድሞቹ ከአባታቸው ጋር በቀራቸው አጭር ጊዜ ማስታወሻ የሚሆን አንዳች ነገር ለማድረግ በማሰብ አባትየው ከልጅነት ጊዜያቸው ጀምሮ ያላቸው ታሪክ በድምጽ እንዲቀዳ ተስማሙ፡፡
በሙያው ጋዜጠኛ የሆነው ጀምስ ሙሉ ሃላፊነቱን በመውሰድ በርካታ ጊዜያትን ወስዶ የአባቱን ታሪክ በድምጽ ቀዳ፡፡ የጀምስ አባት ስኬታማ ጠበቃና የቲያትር ሰው ነበሩ፡፡ በሰው ሰራሽ አስተውህሎት ላይ ልዩ ፍላጎት የነበረው ጀምስ ኮምፒውተሮች እንደሰው እንዲናገሩ ለማስተማር ሙከራ ላይ ነበር፡፡ ይህም የአባቱን ማስታወሻ ለየት ባለ መልኩ ለማስቀመጥ ለየት ያለ እድል ፈጠረለት፡፡
የአባቱን ታሪክ በድምጽ ብቻ ካማስቀመጥ ይልቅ በድምጽ ቅጂው ስለአባቱ ለሚነሱ ጥያቄዎች ሁሉ በአባቱ ድምጽ ምላሽ የሚሰጥ “ዳድ ቦት” የሚል መጠሪያ ያለው የሰው ሰራሽ አስተውህሎት ቻትቦት ፈጠረ፡፡ ይህን ካደረገ ከአንድ አመት በኋላ አባቱ ህይወታቸው አለፈ፡፡
የሰው ሰራሽ አስተውህሎት ውጤቱ የአባቱን ሞት ህመም ባያስረሳውም መጽናኛው እንደሆነ ጀምስ ይናገራል፡፡ በህይወት እያለ ካለው በላይ ስለአባቴ የበለጠ እንዳውቅ አድርጎኛል ይላል፡፡ ለሚጠይቀው ጥያቄ አንዳንዴ በቀልድ የተዋዛ ምላሽ ከቻትቦቱ አባቱ ይሰጠዋል፡፡
በሰው ሰራሽ መንገድ ሟችን ወደ ሕይወት የመመለስ መሰል ተግባራት በልብ-ወለዱ ዓለም ለረጅም ጊዜ ሲሞከር የቆየ ነው፡፡ የሰው ሰራሽ አስተውህሎት መስፋፋትና መዘመን ጋር ተያይዞ ከልብ ወለድነት በዘለለ በገሃዱ ዓለም እንዲሆን እያደረገው ነው፡፡

ወደብዙዎች ጆሮ የደረሰው ዳድ ቦት ዝናው አየናኘ በመላው ዓለም ፈላጊው በዛ፡፡ ስለምን ዳድ ቦት ብቻ ማም ቦትም ስራልን የሚሉ ጠያቂዎች ቁጥራቸው በረከተ፡፡ ይም መነሳሳትን የፈጠረበት ጀምስ በጎርጎሮሳውያኑ 2019 ቻትቦቱን ሰዎች ልክ እንደእሱ በሞት የተነጠቋቸውን የሚወዷቸውን ሰዎች የሚያገኙበትን “ሂር አፍተር ኤአይ” ወደተሰኘ የቢዝነስ መተግበሪያአሳደገው፡፡
ከዳድ ቦት ጋር ተመሳሳይነት ያለው “ሂር አፍተር ኤአይ” ተጠቃሚዎች በቅድሚያ ከልጅነት ጊዜያቸው ጀምሮ ያለውን የህይወት ታሪካቸውንና የሚፈልጉትን መረጃ ከፎቶ-ግራፋቸው ጋር ስልካቸው አሊያም ኮምፒውተራቸው ላይ ባለው መተግበሪያው ላይ ይጭናሉ፡፡
ከህልፈታቸው በኋላ አዲስ የተወለዱት ሳይቀሩ ግለሰቡ በህይወት ያሉ ያክል ስሜት በሚፈጥር መተግበሪያ አማካኝነት ባሻቸው ሰዓት ያዋሯቸዋል፤ በቅጂው ላይ ለሚጠየቀው ጥያቄ የሚሆን ምላሽ ካለ ጥያቄያቸው ምላሽ ያገኛል፡፡












