፨ ፨ ፨ ፨ ፨
አዲስ አበባ | ሚያዚያ 09 2016| NBC ETHIOPIA-የበርካታ ሁነቶች ስብጥር ናት ዓለም፡፡ በእያንዳንዱ ማዕዘናት ለሰሚ ተመልካቹ ግርምትን የሚፈጥሩ ሁነቶች አይጠፉም፡፡ ምናልባትም ከቀያችን አሊያም ራቅ ካሉ ቦታዎች ይህም አለ የሚያስብሉ ጉዳዩች በየዕለቱ ይከሰታሉ የተመረጡትን ወደ እናንተ ልናደረስ ወደድን፡፡
የመጀመሪያ አስገራሚ ጉዳያችን ከወደ ጀርመን የተሰማው ነው፡፡ በጀርመን ግዙፍ የሙዚየም ተቋም የሚሰራው የ51 አመቱ የኤግዚቢሽን ቴክኒሻን በቅፅል ስሙ እራሱን “ፍሪላንስ አርቲስት” እያለ ይጠራል፡፡
እናም ይህ አርቲስት የራሱን የጥበብ ስራ በሙዚየሙ ውስጥ ለእይታ በማስቀመጡ ከስራ ገበታው ሊባረር በቅቷል ይላል የሲኤን ኤን ዘገባ፡፡

ለአጭር ጊዜም ብትሆን ህልሙን እንዳሳካ የሚናገረው ጀርመናዊው የጥበብ ስራዬ በታዋቂው ሙዚየም ውስጥ ተሰቅሎ ማየቴ በሰመመን ውስጥ ያለው እንዲመስለኝ አድርጓኛል ይለናል፡፡
የኋላ የኋላ ግን ደስታውን እንኳን በቅጡ ሳያጣጥም ከሰአታት በኋላ እጣፋንታው ከአሰሪዎቹና ከፖሊስ ጋር ግብ ግብ ውስጥ መግባት ሆኖበታል፡፡
የሙዚየም ኤግዚቢሽን ባለሙያው ከሳላቸው ስዕሎች መሃል አንዱን በታዋቂው በሙኒክ ጀርመን ፒናኮቴክ ዴር ሞዴሬ ተብሎ በሚጠራው ጋለሪው ግድግዳ ላይ ያኖረዋል፡፡
ስዕሎቹን በግድግዳዎቹ ላይ መመልከት የፈጠረለትን ልዩ ስሜት እያጣጣመ የረዥም ጊዜ ህልሙ በግድግዳዎቹ ላይ መመልከቱ እውነት አልመስልህ እያለው ባለበት ቅጽበት የሙዚየሙ የደህንነት ሃላፊዎች ያለ ፍቃድ በግድግዳው ላይ የተጨመረውን ስዕል በመመልከታቸው ወዲያውኑ ከግድግዳው ላይ አውርደውታል፡፡
ይህም ድርጊት በእጅጉ ያስቆጣቸው የሙዚየሙ ሃላፊዎች የኤግዚቢሽን ቴክኒሻኑን ወዲያውኑ ከስራው አሰናብተውታል፡፡ በዚህ ድርጊቱ ትኩረትን ከመሳብ አልፎ መነጋገሪያ የሆነው የሙዚየሙ ሰራተኛ ያስቀመጠው ስዕል 23.6 ኢንች በ47.2 ኢንች የሚሆን እርዝማኔ የነበረው ነው፡፡ ሥዕሉ በግድግዳው ላይ ለምን ያህል ጊዜ እንደቆየ ባይታወቅም ግለሰቡ ግን ለረጅም ጊዜ እንዳልቆየ ተናግሯል። አሁን ላይ ግለሰቡ በንብረት ላይ ጉዳት በማድረስ በሚል በምርመራ ላይ እንደሚገኝ ፖሊስ የገለፀ ሲሆን ጥፋተኛ ሆኖ ከተገኘ እስከ ሁለት አመት የሚደርስ እስራት እንደሚቀጣ አስታውቋል፡፡
በነገራችን ላይ ይህ አይነቱ ትዕይንት ለሃገረ ጀርመን የመጀመሪያ ክስተት እንዳልሆነ እወቁት ያለው የሲኤን ኤን ዘገባ ከሳምንታት በፊት በጀርመን ቦን በሚገኘው ቡንደስኩንታልት ውስጥ ተከስቶ የነበረው ሁነት ያስታውሳል

በዛ አንዲት ተማሪ ከስዕሎቿ አንዱን በኤግዚቢሽን ግድግዳ ላይ አንጠልጥላ እንደነበረም ታውቋል፡፡ አስቂኙ ክስተት ደግሞ ሰራተኞቹ ስዕሉን የተመለከቱት የኤግዚቢሽኑ የቆይታ ጊዜ ተጠናቆ በሚያፈርሱበት ወቅት ተጨማሪ የጥበብ ስራ እንዳለ ሲመለከቱ ነበር፡፡
ሌላይኛው አስገራሚ ጉዳያችን ደግሞ በእንግሊዝ ሃገር አንድ ግለሰብ ወጣ እና ለየት ያሉ የጥበብ ስራዎቹን ልዩ ጥበቃ እንዲኖራቸውና እንዲከለሉ በሚል ምክንያት በተከራየው አፓርታማ ላይ በድብቅ ገንብቶ ማስቀመጡ ነው፡፡

እንደ መረጃችን ጥቆማ መሰረት በአደራና በታማኝነት ለሶስት አስርት አመታት ጎጆውን በቀለሰበት አፓርታማ ላይ በአከራዩቹ ንብረት ግርግዳ እና ቁሳቁሶች ሳይቀር ቀስ በቀስ በድብቅ ወደ ሚፈልገው የጥበብ ስራ ውጤት የቀየረው ግለሰብ ኋላ ላይ አጀብ አስብሏል፡፡
ሁኔታው የታወቀው ግለሰቡ ከሞተ በኃላ ቢሆንም ወጣ ያለ እና ያልተለመደ የጥበብ ውጤት በመሆኑም አሁን ላይ በብሪታንያ መንግስት ጥበቃ እየተደረገለት ይገኛል፡፡
ሮን ጊቲንስ እ.ኤ.አ 2019 በ79 ዓመታቸው ይህን አለም በሞት ከመሰናበታቸው በፊት ቤተሰቦቹ ከዚህ ቀደም ከ1980ዎቹ አጋማሽ ጀምሮ ይኖርበት የነበረውን አፓርታማ ጎብኝተውት እንደነበር ይነገራል፡፡
በወቅቱ በአፓርታማ ውስጥ ያገኙት ነገር በጣም አስደንግጧቸውም ነበር፡፡ ጊቲንስ ቤቱን ሙሉ በሙሉ ታሪካዊ ትዕይንቶችን የሚያሳዩ ሥዕሎች ስሎበታል፡፡ ከሥዕል ሥራዎቹ መካከል የጥንታዊት ግብፅ እና የጆርጂያ እንግሊዝ ምስሎች፤የተቀረጹ እና የተፈለፈሉ የቅሪተ አካላት ውጤቶች እንዲሁም በግድርዳው ላይ ተፈልፍለው የሚገኙ የአንበሳ ጭንቅላት ፍልፍል እና ሌሎች ግዙፍ የዱር አራዊት ጭንቅላት አምሳያዎች ይገኙበታል።
የጥበብ ባለሙያው ጊቲንስ በህይወት እያለ ሰዎች ቤቱን እንዲጎበኙ እንብዛም ፈቃደኛ እንዳልነበር ይነገርለታል፡፡

የእህቱ ልጅ ዊልያምስ ከሞቱ በኋላ በቴሌፎን ከCNN ጋር ባደረገቸው ቃለ መጠይቅ ስትናገር በቤቱ ውስጥ መግባት ይቅርና ማለፍ የማይታሰብ ነበር ትላለች፡፡ አጎቷ ወጣ ያለ እንግዳ ነገር የሚስተዋልበት እንደሆነ ተናግራለች፡፡ በአለባበሱም ሳይቀር ከከተማው ነዋሪ ወጣ ያለም ነበር ትላለች፡፡
ወደ መገበያያ ጎራ ካለ የሚሸምታቸው በርከት ያሉ የሲሚንቶ ከረጢቶች ነበሩ ትላለች። በተጨማሪም ቤተሰቦቹ እንኳን እንብዛም እንዳይጎበኙት ካደረጉት ምክንያቶች አንዱ ይህ ባህሪው ነው ስትል ዊልያምስ በነበራት ቆይታ ተናግራለች፡፡ እያንዳንዱ የአፓርታማው ክፍል በከረጢቶች፣ ሳጥኖች፣ መጽሃፎች፣ የጥበብ እቃዎች እና በእጅ የተፃፉ ማስታወሻዎች የተሞሉ ሆነው ተገኝተዋል፡፡












