NBC Ethiopia
December 29, 2025
የኢትዮጵያ ሀገራዊ ምክክር ኮሚሽን በሀገራችን ኢትዮጵያ በፖለቲካ እና ሃሳብ መሪዎች፤ መንግስት እና የሕብረተሰብ ክፍሎች መካከል እጅግ መሰረታዊ በሆኑ ጉዳዮች ላይ ለዘመናት ሲንከባለሉ የቆዩ የሃሳብ ልዩነቶችን እና አለመግባባቶችን በምክክር ለመፍታት የተቋቋመ ነፃና ገለልተኛ ተቋም መሆኑ ይታወቃል፡፡ በዚህ መነሻነት ኮሚሽኑ እስካሁን በ11 ክልሎች፣ በ2 የከተማ አስተዳደሮች፣ በፌዴራል ባለድርሻ አካላት፣ በውጭ ሀገራት ከሚገኙ ኢትዮጵያዊያን እና ትውልደ ኢትዮጵያዊያን እንዲሁም በተለያዩ መንገዶች አጀንዳን አሰባስቧል፡፡

በዚህ መሰረት ኮሚሽኑ በሌሎች የሀገራችን አካባቢዎች እንዳደረገው ሁሉ በትግራይም ክልል የምክክር ሂደቶችን ለማከናወን እንደተዘጋጀ በተለያዩ አጋጣሚዎች ሲገልፅ ቆይቷል፡፡ ከዚህ ዝግጅት ጋር በተያየዘ ኮሚሽኑ ከትግራይ ባለድርሻ አካላት ጋር ገንቢ የሚባሉ ግንኙነቶችን ሲያደርግ ቆይቷል፡፡
በመሆኑም ኮሚሽኑ በክልሉ ውስጥ ለሚያካሂዳቸው የምክክር ሥራዎች የተለያዩ ባለድርሻ አካላት የሚከተሉትን ተግባራት በኃላፊነት እንዲወጡ እና የሀገራዊ ምክክር ሂደቱ በስኬት እንዲጠናቀቅ የበኩላቸውን እገዛ እንዲያደርጉ ኮሚሽኑ ጥሪውን ያቀርባል፡፡
1. ህዝባዊነትን ማስቀደም
በትግራይ ክልል የሚገኙ የፖለቲካ ኃይሎች፣ የሲቪክ ማህበራት ፣የማህበረሰብ መሪዎች፣ መገናኛ ብዙሃን፣ በጎ ተፅዕኖን የሚፈጥሩ ግለሰቦች፣ ወዘተ ሀገራዊ ምክክሩ ከምንም በላይ ኢትዮጵያዊያን በነገ ተስፋቸው ላይ የሚወያዩበት መድረክ መሆኑን መገንዘብ ይጠበቅባቸዋል፡፡ ከላይ የተዘረዘሩት አካላትም ሆነ ሌሎች ቁልፍ ባለድርሻ አካላት ሀገራዊ ምክክሩን በተመለከተ እስካሁን ያበረከቱት አስተዋፅኦ የሚደነቅ መሆኑ እንደተጠበቀ ሆኖ ሂደቱን የሚደግፉና መሰል ግንዛቤዎችን ለወገኖቻቸው ማስረፅ ይገባቸዋል፡፡

2. የሂደቱን ባለቤትነት መጋራት
በትግራይ ክልል በተለያየ ደረጃ የሚገኙ ባለድርሻ አካላት ሕብረተሰቡ በሂደቱ ላይ የጎላ የባለቤትነት መንፈስ እንዲሰማው የማስተማር ብሎም የማስገንዘብ ሥራዎችን ማከናወን ይጠበቅባቸዋል፡፡ በሂደቱ ላይ የትግራይ ህዝብ ድምፁን በተገቢው ሁኔታ አለማሰማቱ የሚኖረው እንድምታ በቀላሉ መታየት ስለሌለበት፤ እንዲሁም እንዲህ ዓይነቱ ክፍተት የሀገራዊ ምክክር ሂደቱ ከቆመለት ዓላማ ጋር ስለሚፃረር በጥልቀት እና በአስተውሎት ሊታሰብበት ይገባል፡፡
3. ሞራልን መሰረት ያደረጉ አቅጣጫዎችን መጠቆም
የሃይማኖት ተቋማት፣ ምሁራን እና የመገናኛ ብዙሃን የማህበረሰብ ሕሊና በመሆን እንደሚያገለግሉ ይታወቃል፡፡ በመሆኑም በዚህ መነሻነት እነዚህ ተቋማት ሕብረተሰቡን ሀገራዊ ምክክር የአንድ ጊዜ ክስተት ሳይሆን የዘላቂ መግባባት እና ሰላም መንገድ እንደሆነ አቅጣጫ በማሳየት በሀገሩ ኢትዮጵያ ላይ ለዘለቄታው የሚበጁ የመፍትሔ ሀሳቦችን ከሌሎች ወገኖቹ ጋር እንዲያመነጭ ማስቻል ይኖርባቸዋል፡፡












