
በቻይና ሁናን ግዛት ጁጆ ከተማ በተዘጋጀው ኮንፈረንስ ከ700 ሺ በላይ ሰዎች የኢትዯጵያን ባለልዩ ጣዕም ቡና ለማስቀመስ እቅድ ተይዟል።
ቻይና የኢትዮጵያ ቡና ዋና መዳረሻ እየሆነች የመጣች ሲሆን የዛሬ አምስት አመት የኢትዮጵያን ቡና በመግዛት ከነበረችበት 33ኛ ደረጃ በተያዘው አመት ወደ 4ኛ ደረጃ ከፍ ብላለች።
ይህንን የበለጠ ለማሳደግና ወደ ቻይና የሚላከውን የቡና ኤክስፖርት መጠን ከፍ ለማድረግ ነው የአሁኑ ኮንፈረንስ የተዘጋጀው።
ኮንፈረንሱን ያዘጋጀው የኢትዮ ቻይና የወዳጅነት ኮሚቴ የተባለ ድርጅች ነው።
በኮንፍረንሱ የጁጆ ከተማን ከንቲባ ጨምሮ የቻይና ከፍተኛ አመራሮች ተሳታፊ ሆነዋል።
በኮንፍረንሱ ላይ በቻይና የኢትዮጵያ አምባሳደር ተፈራ ደርበው፣ የግብርና ሚንስትር ዴኤታ ዶ/ር ኢፋ ሙለታ፣ የመንግስት ኮሚኒኬሽን አገልግሎት ሚንስትር ዴኤታ አቶ ተስፋሁን ጎበዛይ፣ የቡና እና ሻይ ባለስልጣን ዋና ዳይሬክተር ዶ/ር አዱኛ ደበላ እና ከተለያዩ ክልሎች የተውጣጡ አመራሮች ተገኝተዋል።
ኢትዮጵያ ባለፈው አመት ከ 35 ሺ ቶን በላይ ቡና ለቻይና ገበያ አቅርባለች።












