
አዲስ አበባ | ሰኔ 26፤ 2015 | NBC ETHIOPIA-
ከቆዳ ካንሰር አይነቶች ውስጥ በጣም አደገኛ እና በፍጥነት ከሚዛመቱት ውስጥ ሜላኖማ አንዱ ሲሆን፣ ምንም እንኳን ከሌሎቹ የቆዳ ካንሰር የመከሰት እድሉ አነስ ቢልም ከሌሎቹ በበለጠ ለሞት የሚያደርስ፣ እና አደገኛው የሚባለው የቆዳ ካንሰር አይነት ሲሆን ወደ ሌላው የሰውነታችን ክፍል የመሰራጨት እድሉ ከፍተኛ ነው።
መጀመሪያ በቆዳችን ላይ ሜላኖሳይት የሚባሉ ህዋሳት ሜላኒን የምንለውን በሰውነት ውስጥ የቆዳ፣ የፀጉር እና የቆዳ ቀለም የሚያመርት ንጥረ ነገር ያመርታሉ። ይህ ንጥረ ነገር በተፈጥሮ የሚገኝ የፀሀይ ብርሀን መከላከያ ነው። በተለይም በአልትራቫዮሌት ጉዳት ምክንያት የሚመጡ ጉዳቶችን ይከላከላል። ይህ ማለት ግን ሙሉ ለሙሉ ይከላከላል ማለት አይደለም። ስለዚህ ሚላኖማ የሚከሰተው ሜላኖሳይቶች በተለያዩ ምክንያቶች ያለ አግባብ ሲያድጉ እና ሲጎዱ ነው።
ይህ ችግር በብዛት ደረት፣ ጀርባ፣ አንገት፣ እና ፊት ላይ ይስተዋላል። ከዚህ በተጨማሪ የእጅ መዳፍ፣አይን ላይ፣ የውስጥ እግር ፣እና ጥፍር ስር ይታያል።
አጠቃላይ ስናየው ሜላኖማ በብዛት ወንዶች ላይ ይስተዋላል ነገር ግን ከ50 አመት እድሜ በታች ላይ ደግሞ በብዛት ሴቶች ላይ ይስተዋላል።
Acral lentiginious melanoma የምንለው የሜላኖማ አይነት ደግሞ የውሰጥ እግር ወይም መርገጫችንን እና መዳፋችን ላይ የሚከሰት ችግር ነው። “Acral” የተባለበትም ምክንያት እጅ እና እግር ላይ ስለሚከሰት ነው። ከሌሎች ሜላኖማ አይነት የሚለየው በፀሀይ ብርሀን ብዛት ሳይሆን የዘረመል ለውጥ(genetic mutation) ነው ተብሎ ይታሰባል።
ሜላኖማ ማን ላይ ይከሰታል?
ሜላኖማ በሁለቱም ፆታ እና በማንኛውም የእድሜ ክልል ሊከሰት ይችላል።
ወደ ሌላው የሰውነታችን ክፍል ውስጥ ይሰራጭ ይሆን?
ሜላኖማ በቶሎ ካልታከመ ወደ ሌላው የሰውነት ክፍል ለምሳሌ ወደ
አቅራቢያ የሚገኝ ፍርንተት (lymph node) ፣ ወደ ሳንባ ፣ጉበት፣ አጥንት፣ አእምሮ የመሰራጨት እድሉ ከፍተኛ ነው።
ምልክቶቹስ ምንድን ናቸው?
በቀላሉ ምልክቶቹን ለመረዳት ቆዳ ላይ የወጣው ሞል ቅርፁ የተለያየ ወይም ወጥ ካልሆነ (irregular) ከሆነ፣ ጠርዛቸው ወይም (ጫፋቸው) የተለያየ ከሆነ ፣ቀለሙ የተለያየ አይነት ከሆነ፣ ከአተር ፍሬ ከፍ ያሉ ከሆኑ፣እና በሳምንታት ወይም በወራት ውስጥ ተቀያያሪ ፀባይ ካላቸው።
በቆዳ ላይ ጠቆር ጠቆር ያሉ ብዛት ያላቸው ሞሎች፣ ጠቃጠቆዎች፣ እንደ ቡናማ እ፤ ጠቆር ጠቆር ያሉ እና እድገት ያለው ነው።

ተጋላጭነታችንን እንዴት መቀነስ እንችላለን?
ብዙዎቻችን ፀሀይ መመቆን ልምድ አድርገናል። የፀሀይ ብርሀን በመጠኑ ሲሆን ቫይታሚን D በሰውነታችን እንዲመረት ይረዳል ነገር ግን መዘንጋት የሌለብን ነገር የፀሀይ ጨረር ከፍተኛ በሚሆንበት ሰአት ራሳችንን መጠበቅ፣ ቆዳችንን መሸፈን ፣ባርኔጣዎችን እና ጥላ በመጠቀም፣ የፀሐይ መከላከያ (ሰን ስክሪን) በሀኪም ትእዛዝ መጠቀም ፣በየጊዜው ቆዳችን ላይ ለውጥ እያሳየ ያለ ጥቁር ነጥብ ሲኖር በቆዳ ስፔሻሊስት መታየት ተገቢ ነው።
ቆዳችንን ስናይ ሙሉ በሙሉ የሰውነታችን ክፍል መሆን ይጠበቅበታል። በተለይ ጠየም ያለ ወይም ጠቆር ያለ የቆዳ ቀለም ያላቸው ሰዎች የውስጥ እግራቸውን፣ መዳፍን እና ጥፍራቸውን መመልከትን መርሳት የለባቸውም።
በጣም ወሳኙ ነገር ማህበረሰቡን ማስተማር በተለይ ወላጆችን ስለ ምልከቶቹ ፣ አጋላጭ ምክንያቶቹ እንዲሁም ምልክቶቹ ማስተማር ይጠበቅብናል።
የህክምና አማራጮቹስ?
እንደየደረጃቸው የህክምና አማራጮቹም ይለያያሉ።
ዋነኛው የህክምና አማራጭ ቀዶ ጥገና ሲሆን ይህም በተለይ በመጀመሪያዎቹ ደረጃዎች ላይ ካንሰሩን እና የተወሰነ በዙሪያው ያለውን የቆዳ ክፍል ማስወገድን ያካትታል።ሌሎች የህክምና አማራጮች ለምሳሌ ሊምፍአዲኔክቶሚ (lymphadenectomy)፣ ሜታስታቴክቶሚ (metastasectomy)፣ የጨረር ህክምና (radiation theraphy)፣ ኢሚዩንቴራፒ (immunetherapy) እና ኬሞቴራፒ (Chemotherapy) ያካትታል። ከህክምናው በኋላም የሀኪም ክትትል ማድረግ አስፈላጊ ነው።
በሃና ተሰማ












