
የቴስላ ባለቤት ኢሎን ማስክ በቴክሳስ በሚገኘው ስፔስ ኤክስ (SpaceX) ማዕከል በተካሄደው ደመቅ ያለ ፕሮግራም ላይ መብረር የሚችል አዲስ የሮድስተር (Roadster) የስፖርት መኪና ይፋ አድርገዋል።
በሳይንስ ልብወለድ ታሪኮች ውስጥ ብቻ ይታወቅ የነበረውን ይህንን የበረራ ቴክኖሎጂ የታጠቀው መኪና ከአንድ ሰከንድ ባነሰ ጊዜ ውስጥ እስከ 60 ማይል በሰዓት ፍጥነት በመንደርደር አዲስ የዓለም ክብረ ወሰን አስመዝግቧል።
በተጨማሪም በከፍተኛ ዳገት ላይ የመውጣት፣ ተዘቅዝቆ የመንጠልጠል እና በቆሙ መኪኖች ላይ የመዝለል ትዕይንቶችን አድርጓል።
ይህ አዲስ መኪና አየር ላይ ለመንሳፈፍ እና በፍጥነት ለመንደርደር 10 ቀዳዳዎችን እና ከፍተኛ ጫና ያላቸውን የአየር ታንከሮች የሚጠቀም ሲሆን አሰራሩም የመኪና እና የሮኬት ቴክኖሎጂዎች ውህደት እንደሆነ ተገልጿል።
ኢሎን ማስክ ማሳያው በተካሄደበት ወቅት መኪናው ውስጥ አሽከርካሪ ያልነበረው የሰውን ህይወት አደጋ ላይ ላለመጣል እንደሆነ ገልጸው፣ መኪናው በፈረንጆቹ 2028 ዓ.ም ወደ ምርት እንደሚገባ አስታውቀዋል።
ሆኖም ግን የዘርፉ ባለሙያዎች የመኪናውን አየር ላይ ተንሳፎ የመዝለል ብቃት አድናቆት የሚቸረው ቢሆንም፣ መኪናንና አውሮፕላንን ቀይጦ ረጅም ርቀት መብረር የሚችል ተሽከርካሪ መስራት በርካታ የምህንድስና እና የደህንነት ፈተናዎች እንዳሉበት ይጠቁማሉ።
ውጤታማ የበረራ ተሽከርካሪ ለመስራት አሁንም በርካታ እንቅፋቶች እንዳሉ በመግለጽ፣ መኪናው በእርግጥ ዘላቂ በረራ ያደርጋል ወይስ ዝላይ ብቻ ነው የሚለው ወደፊት የሚረጋገጥ ይሆናል ብለዋል።












