
በአዲስ አበባ በድምቀት የሚከበሩት የመስቀል ደመራና የኢሬቻ በዓላት እሴትና ትውፊታቸውን ጠብቀው እንዲከበሩ ወጣቶች የድርሻቸውን ሚና መወጣት እንደሚጠበቅባቸው የአዲስ አበባ ሰላምና ፀጥታ አስተዳደር ቢሮ አስገነዘበ።
ቢሮው ከአዲስ አበባ ወጣቶችና ስፖርት ቢሮ ጋር በመተባበር “የጋራ መግባባትና ስምምነት ለዘላቂ ሰላም” በሚል መሪ ሃሳብ ከተማ አቀፍ የወጣቶች ኮንፍረንስ እያካሄደ ይገኛል።
የአዲስ አበባ ሰላምና ፀጥታ አስተዳደር ቢሮ ምክትል ኃላፊ ተስፋዬ ደንድር በዚሁ ወቅት እንዳሉት፤ የመስቀል ደመራ እና የኢሬቻ በዓላት የፍቅር፣ የወንድማማችነት፣ የሰላምና የምስጋና በዓላት ናቸው።
እነዚህ በዓላት የሀገራችንን ብዝሃነትና ውበት ለዓለም የሚያስተዋውቁ፣ በርካታ ቱሪስቶች ወደ ከተማችን የሚስቡ ታላላቅ ሀብቶቻችን በመሆናቸው በዓላቱ በስኬት እንዲከበሩ ወጣቶች ሚናቸውን መወጣት ይገባቸዋል ነው ያሉት።
በበዓላቱ የሚታደሙ እንግዶችን በታላቅ አክብሮትና በእንግዳ ተቀባይነት እሴታችን በማስተናገድ የከተማዋን መልካም ገጽታ ለዓለም ለማሳየት ወጣቶች ኃላፊነታቸውን እንዲወጡም ጥሪ አቅርበዋል።












