
የአዲስ አበባ ከተማ አስተዳደር የትንሳኤ በዓልን ምክንያት በማድረግ ዝቅተኛ ገቢ ላላቸው ከ233 ሺህ በላይ ለሚሆኑ ዜጎች ማዕድ አጋርቷል።
የአዲስ አበባ ከንቲባ አዳነች አቤቤ ከተማ አስተዳድሩ በዓላት ሲመጡ ብቻ ሳይሆን ለህብረተሰቡ ፈተና የሆኑ ችግሮች ላይ በትኩረት እየሰራን እንደሚገኝ ገልጸዋል፡፡
በከተማዋ የሚከናወኑ ልማቶችም ሁሉንም ህብረተሰብ ያማከሉ እንዲሆኑ እየተሰራ ነው ያሉት ከንቲበዋ የትኛውንም ማህበረሰብ ያልዘነጋ እንዲሆን ጥንቃቄ በማድረግ እየተሰራ ነው ብለዋል፡፡
የ2018 ትንሳኤን በዓልን ምክንያት በማድረግ በከተማዋ ሁሉም ክፍለ ከተሞች ለሚገኙ ዝቅተኛ የኑሮ ደረጃ ላይ ለሚገኙ 233 ሺህ ነዋሪዎች ማዕድ የማጋራት ስራ እንደሚካሄድ ተገልጿል፡፡
ከንቲባ አዳነች በርካታ ጊዜያዊ ችግሮች ማህበረሰቡን የሚጎዱበት ሁኔታ በመኖሩ ድጋፍ ማድረግ የዘውትር ስራችን ሆኗል ብለዋል፡፡ በተለይ ዘላቂ ድጋፍ የሌላቸው የከተማዋ ነዋሪዎች የማገዝ ስራ ላይ በትኩረት እየተሰራ እንደሚገኝ ገልጸዋል፡፡
ለሌሎች የከተማዋ ነዋሪዎች ወቅቱን መሰረት ያደረገ እንዲሁም በመካከለኛው ምስራው ውጥረት ሳቢያ በነዳጅ አቅርቦት ላይ በተፈጠረው ጫና የገበያውን ጉድለትት ለሟሟላት ድጎማ እየተደረገ መሆኑን ተናግረዋል፡፡
በዚህ ምርት በተመጣጣኝ እንዲቀርብ ብሎም የአቅርቦት እጥረት እንዳይፈጠር እየተሰራ መሆኑን ጠቁመዋል፡፡ ከንግድ ኮርፖሬሽን፤ከሸማቾች ሱቅ እና እሁድ ገበቻች ጋር በመቀናጀት የተረጋጋ የገበያ ሁኔታ እንዲኖር ጥረት እየተደረገ መሆኑን ገልጸዋል፡፡
ዝቅተኛ የኑሮ ደረጃ ላይ ያሉ ወገኖች ለማገዝ በሚደረግ ጥረት ባለሀብቶች ከፍተኛ እገዛ እያደረጉ በመሆኑ ምስጋና አቅርበዋል።
የአዲስ አበባ ከተማ አስተዳደር የህብረተሰብ ተሳትፎና በጎ ፈቃድ ማስተባበሪያ ኮሚሽነር ይመር ከበደ፤ በከተማዋ የመደጋገፍና የመተባባር ባህል እየሆነ መምጥቱን ገልጸዋል፡፡
የበዓል ወቅት ላይ የሚደረጉ ድጋፎች የእዚህ ማሳያ መሆናቸውን አንስተዋል፡፡ የ2018ትንሳኤን በዓል ምክንያት በማድረግ ከ233 ሺህ በላይ ዜጎች ያካተተ የማዕድ ማጋራት እንደሚካሄድ ጠቁመዋል፡፡
በ-ሰላም ይልማ












