
የኢትዮጵያ ብሔራዊ ባንክ ዛሬ ባወጣው የፋይናንስ ሪፖርት የዲጂታል ፋይናንስ አገልግሎት በከፍተኛ ፍጥነት እያደገ መምጣቱ የተገለጸ ሲሆን፣ የግብይት መጠኑም በእጥፍ በማደግ 18.5 ትሪሊዮን ብር መድረሱን አስታውቋል።
የዲጂታል ፋይናንስ ዕድገቱ የፋይናንስ ተደራሽነትን ቢያሰፋም፣ ከሳይበር ጥቃት እና ከማጭበርበር ጋር ተያይዘው የሚመጡ ስጋቶችን ለመከላከል የቴክኖሎጂ መሠረተ ልማትን ማጠናከር እንደሚገባ ተመላክቷል።
የኢትዮጵያ ብሔራዊ ባንክ ከሐምሌ 2016 እስከ ሰኔ 2017 ያለውን የፋይናንስ ሥርዓት ደኅንነት እና መረጋጋት የገመገመበትን 3ኛውን የፋይናንስ መረጋጋት ሪፖርት ዛሬ ይፋ አድርጓል።
የኢትዮጵያ የፋይናንስ ሥርዓት በዓለም አቀፍ ደረጃ ካጋጠሙ የኢኮኖሚ መቀዛቀዝ እና ጂኦ-ፖለቲካዊ ውጥረቶች ተፅዕኖ ተከላክሎ መረጋጋትን ማሳየቱ በሪፖርቱ ተገልጿል።
ባለፈው የሰኔ ወር መጨረሻ ላይ በተካሄደ ጫናን የመቋቋም ምርመራ የኢትዮጵያ ባንኮች ማንኛውንም ዓይነት ድንገተኛ የኢኮኖሚ መዋዠቅን የመቋቋም አቅም እንዳላቸው ተረጋግጧል።
በበጀት ዓመቱ የኢኮኖሚ ዕድገት መሻሻል የታየበት እና የዋጋ ግሽበት የቀነሰበት በመሆኑ ለፋይናንስ ተቋማት የተረጋጋ የሥራ አካባቢ መፈጠሩ ተመልክቷል።
የባንክ ዘርፉ ካፒታልን በማጠናከር፣ የብድር ጥራትን በመጠበቅ እና ትርፋማነትን በማሳደግ ረገድ ዝቅተኛ ስጋት ያለበት እና ጠንካራ ሆኖ ቀጥሏል።
የማይክሮ ፋይናንስ፣ የኢንሹራንስ እና የካፒታል ዕቃዎች ፋይናንስ ዘርፎች የሥራ አፈጻጸም ካለፈው ዓመት ጋር ሲነጻጸር መሻሻል ማሳየታቸው ተጠቅሷል።
ለ2018 በጀት ዓመት የኢኮኖሚ ዘመን የዋጋ ግሽበት ወደ ነጠላ አሐዝ ዝቅ ይላል ተብሎ የሚጠበቅ ሲሆን፣ የውጭ ምንዛሬ ገቢም እንደሚያድግ በሪፖርቱ ተተንብዩዋል።












