
ጤናማና አምራች ሀገር ለመፍጠር የጤና ተቋማት በትብብር ሊሰሩ እንደሚገባ ዶክተር መቅደስ ዳባ ተናገሩ።
የመንግሥትና የግል የጤና ዘርፍ ትስስር መጠናከር ዘመኑን የሚመጥን የህክምና አገልግሎት መስጠት ማስቻሉን የጤና ሚኒስትር ዶክተር መቅደስ ዳባ ተናግረዋል።
ሚኒስትሯ ይህን ያሉት አራተኛው የኢትዮጵያ ሆስፒታሎች ጥምረት ለጥራት ኢኒሼቲቭ የእውቅናና የሽልማት ስነስርዓት በተካሄደበት ወቅት ነው።
ዶክተር መቅደስ በመድረኩ ላይ ባደረጉት የመክፈቻ ንግግር የኢትዮጵያ ሆስፒታሎች ጥምረት ለጥራት ኢኒሼቲቭ በሀገሪቱ የሚገኙ የጤና ተቋማት እርስ እርስ ልምድ የሚለዋወጡበት፣ የሚማማሩበት እና ድጋፍ የሚያደርጉበት እድል መፍጠሩን አመላክተዋል።
በተጨማሪም በመረጃ የተደገፈ የጤና አገልግሎት በማስፋፋት የተቋማት የጤና የአገልግሎት ጥራት ማደጉንና የተደራሽነት ክፍተት መቀረፉን ገልፀዋል።
ዶክተር መቅደስ በዚሁ ንግግራቸው የጤና ሚኒስቴር ጥራት፣ ፍትሃዊነት እና ተደራሽነት ላይ ትኩረት በማድረግ እየሰራ እንደሚገኝ አብራርተዋል።
በዛሬው እለት ከተካሄደው የእውቅናና የሽልማት ፕሮግራም ባለፈ የህክምና ተቋማት በቀጣይ ሶስት አመት የሚተገብሯቸው የትኩረት አቅጣጫዎች ይፋ የሚደረጉበት ነው ተብሏል።
በ -ብርሃን እሸቴ












