February 16, 2026
ኢትዮጵያ የሴቶችና ወጣቶችን የፈጠራና የሥራ ዕድል አቅም የሚያሳድጉ ወሳኝ የፖሊሲ ርምጃዎችን በመውሰድ ውጤት እያስመዘገበች መሆኑን የኢፌዴሪ ፕሬዝዳንት ታዬ አፅቀሥላሴ ገለጹ። በአፍሪካ የወጣቶችን ክህሎት በማጠናከር ዘላቂ የስራ ዕድል ተጠቃሚነት ለማረጋገጥ የፓን አፍሪካ የኢኖቬሽን ኮሪደር መፍጠር ይገባልም ብለዋል።

የአፍሪካ ቢዝነስ ፎረም 2026 “የአፍሪካን የወደፊት ተስፋ በገንዘብ መደገፍ፣ የሥራ ዕድልና ኢኖቬሽን ለዘላቂ ሽግግር” በሚል መሪ ሀሳብ በአፍሪካ ኢኮኖሚክ ኮሚሽን እየተካሄደ ነው። የኢፌዴሪ ፕሬዝዳንት ታዬ አፅቀሥላሴ በዚህ ወቅት እንዳሉት፤ የአፍሪካ ሕብረት አጀንዳ 2063 ወጣቶችን የአህጉሪቱ ህዳሴ አብሳሪ እንዲሆኑ ማስቻል ነው።
በአፍሪካ 70 በመቶ ዜጎች ከ30 ዓመት በታች መሆናቸውን ገልጸው፤ መስራት ከሚችሉ 362 ሚሊዮን ዜጎች የስራ ዕድል መፍጠር የሚችሉት የግብርና፣ የአገልግሎትና ሌሎችም ዘርፎች አቅም ግን ከ151 ሚሊዮን አይበልጥም ብለዋል ይሄ አፍሪካ ወጣቶችና ሴቶችን ታሳቢ ያደረገ ክህሎት ግንባታ፣ ስራ ዕድል ፈጠራና ኢኖቬሽን ላይ መስራት እንዳለባቸው የሚያሳይ መሆኑን ገልጸዋል።
በአፍሪካ በቂ የስራ ዕድል የሚፈጥሩ የአምራች ኢንዱስትሪዎች፣ የትራንስፖርት መሰረተ ልማትና ጠንካራ ተቋማት ሊኖሩ ይገባል ብለዋል። ከዚህ አንፃር ኢትዮጵያ የወጣቶችና ሴቶችን የዲጂታል ክህሎት፣ ፈጠራና ኢኖቬሽን ላይ በትኩረት እየሰራች መሆኑን ገልጸዋል። ኢትዮጵያ ለወጣቶች ክህሎትን መሰረት ያደረገ የስራ ዕድል ለመፍጠር ወሳኝ የፖሊሲ ርምጃ መውሰዷን በመግለጽ፤ ይሄንን ተከተሎ ከተፈጠሩ የስራ ዕድሎች 84 በመቶ የሚሆኑት ወጣቶች ናቸው ብለዋል።
ወጣቶች አዲስ ሀሳብ የሚያፈልቁ መሆናቸውን በመጥቀስ፣ ኢትዮጵያ የስታርትአፕ አዋጅ በማውጣት በአነስተኛና መካከለኛ ኢንተርፕራይዞች ንቁ ተሳታፊ የሚሆኑበትን ዕድል መፍጠሯን ገልጸዋል።

የዲጂታል ኢትዮጵያ 2030 ስትራቴጂ የዲጂታል ስርዓትን በማዘመን የአምራችና አገልግሎት ዘርፉን ወደ ፈጣንና ዘላቂ ሽግግር ማራመድ ያስችላል ብለዋል። በአዲስ አበባ የኮሪደር ልማትና የወንዝ ዳርቻ ፕሮጀክቶች በሺዎች ለሚቆጠሩ ሴቶችና ወጣቶች የስራ ዕድል ተፈጥሯል ብለዋል። በአፍሪካ የወጣቶችን የኢኖቬሽንና ስራ ፈጠራ አቅም ለማሳደግ የፓን አፍሪካ የኢኖቬሽን ኮሪደር መፍጠር ወሳኝ መሆኑንም ገልጸዋል። የአፍሪካ አህጉራዊ ነፃ የንግድ ቀጣናን ተግባራዊ ማድረግ አንዱ ወሳኝ ጉዳይ መሆኑንም አንስተዋል። ለዚህ ደግሞ ተቋማዊ አሰራርን በመገንባትና በማዘመን ወጣት መር ስታርትአፖችን ማሳደግ ይገባል ማለታቸውን የዘገበው ኢዜአ ነው፡፡











