
“ለጠቅላይ ሚኒስትሩ ተጠሪ የሆኑ አስፈጻሚ አካላትን የ2018 በጀት ዓመት የግማሽ ዓመት አፈጻጸም ዛሬ ገምግመናል፡፡
ባለፉት የለዉጥ ዓመታት የብልጽግና ዕሳቤ መሬት ነክቶ ፍሬ እያፈራ ነው፡፡ ለዚህ ደግሞ ተቋማትና የተቋማት መሪዎች ግንባር ቀደም ተዋንያን ናቸው፡፡
የብልፅግና ጉዞ “እየሠራሁ ነው፤ ልሠራ ነበር፤ በመሥራት ላይ ነኝ”፤ የሚሉ ሪፖርቶችን አይቀበልም፡፡ ከተሠራ መታየት፤ ከተከናወነ መዳሰስ አለበት፡፡
በ2018 ዓ.ም የአዲስ ዓመት ዋዜማ ታላቁ የኢትዮጵያ ሕዳሴ ግድብን አጠናቀን በጉባ ታላላቅ ሀገራዊ ፕሮጀክቶችን አብስረናል። የቢሾፍቱ ዓለም አቀፍ ኤርፖርት እንዲሁም የነዳጅ እና የማዳበሪያ ፋብሪካን ጨምሮ በሀገሪቱ የተለያዩ አካባቢዎች ሜጋ ፕሮጀክቶችን ጀምረናል፡፡
መንግሥታችን ጀምሮ በፍጥነት መጨረስ መለያው ነው፤ በዚህ እሳቤ የተጠናቀቁትን ሸበሌ ሪዞርትንና አይሻ-2 የንፋስ ኃይል ማመንጫን አስመርቀናል፡፡ በቅርቡም የምናስመርቃቸው አሉ፡፡ መንገዶች፣ ድልድዮች፣ ግድቦች፣ ቤቶች፣ እየተገነቡ ናቸው፡፡ የጉባ ብሥራቶች ቀስ በቀስ ሥር ሰድደው ተግባራዊ እየሆኑ ናቸው፡፡
በዛሬው ግምገማችን የስራ እንቅስቃሴዎቻችንን እና ስኬቶቻችንን በልኩ መዝነናል፤ ድክመቶቻችንን ያለ ምሕረት ለማረም ተግባብተናል፤ የመፍትሔ መንገዶችን የሚያመላክት እና አዳዲስ ስልቶችን ለመንደፍ የሚያስችል ገንቢ ምክክር አድርገናል።
ባለፉት ዓመታት እና በበጀት ዓመቱ የመጀመሪያ አጋማሽ ባስመዘገብነዉ ድል ሳንኩራራ ነገር ግን በልኩ እየተበረታታን በቀጣይ ስድስት ወራት ለላቀ ውጤትና ድል ለመትጋት ተግባብተናል፡፡”













