ኢትዮቴሌኮምና የኢትዮጵያ መድሃኒት አቅርቦት አገልግሎት የመድሃኒት አቅርቦቱን ለማዘመንና ዲጂታል ለማድረግ ተስማሙ።
ስምምነቱን የኢትዮቴሌኮም የቴክኖሎጂ ቺፍ ኦፊሰር ታሪኩ ደምሴና የኢትዮጵያ መድሃኒት አቅርቦት አገልግሎት ዳይሬክተር ጄነራል ዶ/ር አብዱልቃድር ገልገሎ ተፈራርመዋል።
በመርሃ ግብሩ ላይ ንግግር ያደረጉት የጤና ሚኒስትር ዶ/ር መቅደስ ዳባ የጤና ዘርፉን ዲጂታል ለማድረግ ስትራቴጂ ተነድፎ እየተሰራ መሆኑን ጠቁመው ስምምነቱ የመግባቢያ ሰነድ ብቻ ሳይሆን ይህንን ተግባራዊ የማድረግ አካል ነው ብለዋል። ሚንስትሯ የመድሃኒት አቅርቦት ዘርፉ ተገልጋዩ ህብረተሰብ የሚያማርርበት የነበረ መሆኑን ጠቁመው ዘርፉን ዲጂታል ማድረግ ችግሩን ለመፍታት ያግዛል ሲሉም ተናግረዋል።

የኢትዮጵያ መድሃኒት አቅርቦት አገልግሎት ራሱን ለማዘመን እየሰራ የተቋሙ ዳይሬክተር ጄነራል ዶ/ር አብዱልቃድር ገልገሎ አስታውቀዋል። አገልግሎታችንን ዲጂታል ለማድረግና አለም ከደረሰበት ደረጃ ለመድረስ እየሰራን ነውም ብለዋል።
ዶ/ር አብዱልቃድር የወረቀት አልባ አገልግሎትን ጀምረናል ያሉ ሲሆን ከኢትዮቴሌኮም ጋር በመተባበር የባር ኮዲንግ አገልግሎት በዚህ አመት እንደሚጀመርም ጠቁመዋል። አሁን ላይ 400 የሚደርሱ የተቋሙ ተሽከርካሪዎች ጂፒኤስ ተገጥሞላቸው የህክምና ቁሳቁሶችን ይዘው የት እንደደረሱ ለማወቅ መቻሉን ጠቁመዋል።

ዘመኑ በደረሰበት ቴክኖሎጂ ተጠቅመን ራሳችንን ማዘመን አስፈላጊ ነው በማለት የጤናው ዘርፍን ለማዘመን የጤና ሚኒስቴርና ኢትዮ ቴሌኮም እያደረጉት ላለው አስተዋፅዖ ምስጋና አቅርበዋል።
በ-አብርሃም በለጠ












