በ2 ነጥብ 5 ቢሊዮን ዶላር ወጪ የሚገነባው የማዳበሪያ ፋብሪካ በ40 ወራት እንደሚጠናቀቅ ጠቅላይ ሚኒስትር ዐቢይ አሕመድ (ዶ/ር) ገለፁ።
የኢትዮጵያ ኢንቨስትመንት ሆልዲንግ እና ዳንጎቴ ግሩፕ በጎዴ ከተማ ዓለም አቀፍ ደረጃውን የጠበቀ የዩሪያ ማዳበሪያ ማምረቻ ኮምፕሌክስን ለመገንባት የሚያስችል ስምምነት ፈፅመዋል።

ስምምነቱን በተመለከተ ጠቅላይ ሚንስትር ዐቢይ አሕመድ (ዶ/ር) በሰጡት ማብራሪያ እንደገለፁት፤ ፋብሪካው 3 ሚልየን ቶን በዓመት ማምረት የሚችል ነው። ስምምነቱ ከፋብሪካው ግንባታ በተጨማሪ የጋዝ ምርትን እስከ ፋብሪካው የሚያደርስ ከ100 ኪሎ ሜትር በላይ የነዳጅ መስመር ግንባታ ያካተተ መሆኑን ተናግረዋል።
የፋብሪካው ግንባታ በቅርቡ የሚጀመር ሲሆን፤ በ40 ወራት እንደሚጠናቀቅ ጠቅሰዋል። ይህ ሥራ ኢትዮጵያ የጀመረችውን የብልፅግና ጉዞ ከሚያረጋግጡ አንኳር ስትራቴጂ ኢንቨስትመንቶች መካከል አንደኛው መሆኑን ገልፀዋል።
ፕሮጀክቱ በሚቀጥሉት 40 ወራት ስጠናቀቅ በኢትዮጵያ ግብርና ሴክተር ላይ ተጨባጭ ውጤት አምጥቶ የምግብ ሉዓላዊነት ለማረጋገጥ የምናደርገውን ጥረት በአስተማማኝ መሰራት ላይ የሚያስቀምጥ እንደምሆን ሙሉ እምነት እንዳላቸው ተናግረዋል።












