በእስራኤል እና ሀማስ መካከል ላለፉት ሁለት ዓመታት እየተካሄደ ባለው ጦርነት 18 ሺ ያህል ፍልስጤማውያን ህጻናት መገደላቸው ተገልጿል።
በሁለቱ ወገኖች መካከል በመካሄድ ላይ ባለው ጦርነት ባለፉት ሁለት ዓመታት ከ62 ሺ በላይ ፍልስጤማውያንን ሲገደሉ፣ 18,885 የሚሆኑት ህፃናት መሆናቸውን የጋዛ የመንግስት ሚዲያ ጽህፈት ቤት አስታውቋል። ይህም በጋዛ ያለው ሁኔታ አሳዛኝ እና አሰቃቂ መሆኑ ተመድ ባወጣው መረጃ ተገልጿል ።
በተባበሩት መንግስታት የፍልስጤም ስደተኞች ኤጀንሲ (UNRWA) ባወጣው መግለጫ እስራኤል እየወሰደች ባለችው ወታደራዊ እርምጃዎች ምክንያት በጋዛ ለሚኖሩ ህፃናት ፈታኝ እንደሆነባቸው ብሎም ምንም አስተማማኝ ስፍራ አለመኖሩን ገልጿል።
እስራኤል ለፍልስጤማውያን በጣም አስፈላጊ የሆኑት እርዳታዎች እና የህክምና ቁሳቁሶች እንዳይገቡ በመከልከሏ ምክንያት በጋዛ ውስጥ በረሃብ የሚሞቱት ሰዎች ቁጥር ከፍተኛ እንደሆነም ኤጀንሲው አስጠንቅቋል።
እስራኤል እና ሃማስ ሙሉ ለሙሉ የተኩስ አቁም ስምምነት በአፋጣኝ ካላደረጉ በጋዛ የሟቾች ቁጥር አሁን ካለው በአስደንጋጭ ሁኔታ ሊያሻቅብ እንደሚችል ተመድ አሳስቧል ሲል የዘገበው አልጀዚራ ነው ።
በ-ሰላማዊት ወልደገሪማ












