እስራኤል በጋዛ ታግተው የሚገኙ ሁሉንም ታጋቾች ሃማስ እንዲለቅ ጥሪ አቅርባለች።
ቴልአቪቭ በሃማስ ታግተው የሚገኙ 50 ታጋቾች በሙሉ እንዲለቀቁ እንደምትፈልግ ነው የገለጸችው። በኳታር እና በግብፅ የቀረበው የ60 ቀናት የተኩስ አቁም ስምምነት ተፈጻሚነት ላይ እስራኤል ጥርጣሬ እንዳላት ተገልጿል።
በ60 ቀናት የተኩስ አቁም ስምምነት 10 በህይወት ያሉ እና 18 የሞቱ እስራኤላውያን በአጠቃላይ 28 ታጋቾችን ለመልቀቅ እና ቋሚ የተኩስ አቁም ብሎም ቀሪ ተጋቾችን የማስለቀቅ ድርድር እንደሚቀጠል ነው ከስምምነት የተደረሰው።
ይህ ተከትሎም እስራኤል የኳታርን ሀሳብ በግልጽ ባትቀበልም፣ አሁን ባለው ሁኔታ የሁሉንም ታጋቾች መለቀቅ እንደ ቅድመ ሁኔታ ማቅረቧ፣ የሰላም ሂደቱ ላይ ተጨማሪ ውጥረት ፈጥሯል። የፖለቲካ ተንታኞች ይህ አቋም በሁለቱ ወገኖች መካከል ያለውን የጋራ መግባባት ይበልጥ እንደሚያወሳስበው ይገልጻሉ። እስራኤል ከ22 ወራት ጦርነት በኋላ ከ50 ታጋቾች ውስጥ 20 ያህሉ ብቻ በህይወት እንዳሉ በተደጋጋሚ አስታውቃለች ።
የእስራኤል ካቢኔ የጋዛ ከተማን ሙሉ በሙሉ ለመቆጣጠር የወጣውን ወታደራዊ እቅድ ማጽደቁን ተከትሎ፣ በሃማስ ታጣቂዎች ታግተው የሚገኙ ዜጎችም ለማስለቀቅ ከፍተኛ የሆነ ወታደራዊ ኦፕሬሽን ሊካሄድ እንደሚችል የእስራኤል መከላከያ ሰራዊት አስጠንቅቋል።
ዘገባው የቢቢሲ ነው
በ-ሰላማዊት ወልደገሪማ












