ልክ በዛሬው ቀን የፀረ አፓርታይድ ንቅናቄ መሪ የሆነው ኔልሰን ማንዴላ እ.ኤ.አ በ1918 ሀምሌ 18 በደቡብ አፍሪካ በኢስተርን ኬፕ ውስጥ ባለችው ሙቬዞ የተባለች መንደር ውስጥ ተወለደ።
ኔልሰን ማንዴላ የማዲባ ጎሳ አለቃ ሄንሪ ማንዴላ ልጅ ነበር። አባቱ ከሞተ በኋላ ወጣቱ ኔልሰን ያደገው የቴምቡ ገዥ በሆነው በጆንግንታባ ነበር። ማንዴላ 23 ዓመት ሲሞላው በጎሳው ደንብ መሰረት የሚመጣለትን ሚስት ላለማግባት ሲል ያደገበትን ከተማ ትቶ ወደ ጆሃንስበርግ ሄደ።
በ 25 ዓመቱ ዩኒቨርሲቲ በመግባት ማንዴላ በፎርት ሃሬ ዩኒቨርሲቲ እና በዊትዋተርስራንድ ዩኒቨርሲቲ ተምረው በ1942 በህግ ተመርቋል። ከዚያ ፊቱን ወደ ትግሉ በማዞር የአፍሪካ ብሔራዊ ኮንግረስ በተባለው ፓርቲ ውስጥ ንቁ ተሳታፊ መሆን ጀመረ።
በ1952 ማንዴላ የፓርቲው ምክትል ፕሬዚዳት በመሆን የአፓርታይድ ሥርዓትን በጽኑ መታገል ጀመረ። በ1956 ማንዴላ በአገር ክህደት ወንጀል በጊዜው በነበረው የነጮች መንግስት ተከሰሰ ክሱ አምስት ዓመት ያህል በክርክር ከቆየ በኋላ ማንዴላ በክርክሩ አሸነፈ።
ማንዴላ በትምህርቱ እና በፖለቲካ እንቅስቃሴዎቹ የተነሳ በአፍሪካ የነፃነት እና የሰውነት መብት ታሪክ ውስጥ አስደናቂ ሚና ተጫውቷል። በ1963 ማንዴላና ሌሎች የአፍሪካ ብሔራዊ ኮንግረስ መሪዎች መንግስትን በሃይል ለመገልበጥ የሚል ክስ ተከፈተባቸውና ፍርድ ቤት ቀረቡ።
የፍርድ ቤት ክርክሩ አመታትን ተሻግሮ እ.ኤ.አ ሰኔ 12 1964 የፀረ አፓርታይድ ታጋይ እና የደቡብ አፍሪካው የአፍሪካ ብሄራዊ ኮንግረስ ፓርቲ መሪው ኔልሰን ማንዴላ የዕድሜ ልክ እስራት ተበየነበት።
ማንዴላ ጠባብ በሆነች ክፍል ያለማረፊያ ፣ከከባድ የጉልበት ስራ ቅጣት ጋር ሲሰቃይ ኖሮ መጨረሻ ላይ አገሩን ከአፓርታይድ አገዛዝ ነፃ አውጥተው ፕሬዝዳንት እስከመሆንም ደርሷል፡፡በፈፀመው ተጋድሎም የሰላም ኖቤል ተሸላሚ ሆነ ነበር።
ማንዴላ በጥቂት ነጮች የበላይነት የተያዘውን የመንግስት እና የዘር መድሎን በመቃወም ከህጋዊ ሰላማዊ የፓርቲ ትግል እስከ የደፈጣ ትግል በማድረግ ያሰበውን ዓላማ አሳክቷል፡፡ ማንዴላ ከሮቢን ደሴት ሌላ በተዘዋወረባቸው ተጨማሪ እስር ቤቶች በጠቅላላ 27 ዓመት በ እስር ቆይቶል።
በ1994 በደቡብ አፍሪካ በተደረገው ምርጫ አሸንፎ የአገሪቷ የመጀመሪያ ጥቁር ፕሬዚዳንት መሆን ችሎ ነበር። በ1997 ከ ኤ ኤን ሲ ሊቀመንበርነት የለቀቀ ሲሆን በ1999 ደግሞ ፕሬዚዳንትነት በቃኝ በማለት እራሡን አግልሏል።
በግል ህይወታቸው ሳቂታና ተጫዋች መሆናቸው ይነገርላቸዋል። ፈገግታቸው የማንንም ልብ ሰርስሮ የሚገባ ነው። ኔልሰን ሮህሊላ ማንዴላ በተወለዱ በ95 ዓመታቸው እ.ኤ.አ ታህሳስ 5 2013 ከዚህ ዓለም በሞት ተለዩ።
በ ሔርሜላ ተመስገን












