May 22, 2025
በወቅታዊ የጸጥታ ጉዳዮች ዙሪያ አስተያየታቸውን የሠጡት የአማራ ክልል ሠላም እና ፀጥታ ቢሮ ሀላፊ የሆኑት እሸቱ የሱፍ(ዶ/ር)፣ የአማራ ክልል የጸጥታ ችግር ከጊዜ ወደ ጊዜ መሻሻል ላይ እንደሚገኝ እንዲሁም ከሕዝብ ጋር የሚደረጉ ውይይቶችም እንደጨመሩ ገልጸዋል። “ውይይቶችም ፍሬ እያፈሩ ነው። በክልሉ በሁሉም አካባቢዎች የሰላም አማራጮችን የሚመርጡትም እየበዙ ነው። ይህ ደግሞ በክልሉ ያለውን ሰላም የበለጠ ዘላቂ እና አስተማማኝ እንዲኾን እያደረገው ይሄዳል” ያሉት ሀላፊው፣ ስለ ሰላም የሚዘምሩት፣ ስለ ሰላም የሚሰብኩት፣ ስለ ሰላም የሚወያዩት እና ሰላምን ለማጽናት የሚተጉትም በርክተዋል ብለዋል።

በማብራሪያቸውም የአማራ ክልል ባለፉት ጊዜያት በከፍተኛ የጸጥታ ችግር ውስጥ እንደነበር አስታውሰው፣ ችግሩ ክፉ ጠባሳ የጣለ ክስተት ነበር። በሰው ሕይዎት፣ በንብረት እና በሥነ ልቦና ላይም ጉዳት አድርሷል ነው ያሉት። አሁን ላይ ግን በክልሉ የተረጋጋ ሰላም አለ፤ በየአካባቢው ያሉ የአሥተዳደር እርከኖች መንግሥታዊ አመራር የሚሰጥባቸው ናቸው ብለዋል። የጸጥታ መዋቅሩ ከጊዜ ወደ ጊዜ የማድረግ አቅሙ እያደገ፣ የመፈጸም አቅሙ ከፍ እያለ መሄዱንም አንስተዋል።
ሕዝብን ባለቤት በማድረግ የሰላም ሁኔታውን የበለጠ የተሻለ ለማድረግ በርካታ ሥራዎች መሠራታቸውንም ገልጸዋል። ከፍተኛ የመንግሥት መሪዎች እስከ ቀበሌ ድረስ ወርደው ከሕዝብ ጋር እየተወያዩ ነው ያሉት ኀላፊ፣ አውዳሚ ሃሳቦች እንዲታረሙ፣ ለሰላም እና ለውይይት ራሱን እንዲያዘጋጅ የሚያደርጉ ሥራዎች እየተሠሩ ነው ብለዋል። የጸጥታ ኃይሉ አካባቢዎችን በተገቢው መንገድ እየመራ እና ሰላምን እያረጋገጠ መኾኑንም አስታውቀዋል። ለአማራ ክልል ሕዝብ የሚበጀው ችግሮችን በውይይት መፍታት ነው ያሉት ኀላፊው ግጭት አውዳሚ ነው፣ የኋላቀርነት አስተሳሰብ መገለጫ ነው ሲሉ አጽንኦት ሰጥተው ተናግረዋል።
በግጭት ውስጥ የነበሩ ታጣቂዎችም፣ ስህተት መኾኑን እያመኑ፣ የአማራ ክልልን ሕዝብ አጎሳቁያለሁ፤ በድያለሁ እያሉ የሰላም አማራጮችን እየተቀበሉ ነው። ይህን ያመጣው ደግሞ ውይይት ነው፤ ውይይቶቹ ብዙ ነገር ቀይረዋል፤ ውጤትም አምጥተዋል ብለዋል። የአማራን ሕዝብ እና መንግሥት በጠላትነት ከሚያይ ኃይል ጋር አናብርም እያሉ ብዙዎች እየመጡ ነው፤ ሌሎችም ይሄን አካሄድ መከተል አለባቸው ነው ያሉት። ልጆች እንዳይማሩ መፍረድ ምን ማለት ነው? ሲሉ የሚጠይቁት ኀላፊው፣ ግጭት ትውልድን ከመግደል የዘለለ ጥቅም የለውም። የሰላም አማራጮችን እስካሁን ያልተቀበሉትም ቆም ብለው አስበው ሰላምን መምረጥ አለባቸው፤ ምክራችን ይህ ነው ማለታቸውን የዘገበው አሚኮ ነው።
መንግሥት አሁንም የሰላም አማራጩ ክፍት ነው። በየአካባቢው ካሉ የሀገር ሽማግሌዎች እና የሃይማኖት አባቶች ጋር እየተነጋገሩ ሰላምን መምረጥ ይገባቸዋል። የእኛ ጀግና እያሉ ሀገር እንዲወድም የሚገፋፉ አይጠቅሟቸውም፣ የሚጠቅማቸው ሰላም እና ሰላም ብቻ ነው ። ኅብረተሰቡም ልጆቹን መምክር፣ ወደ ሰላም መመለስ አለበት። ሁለት ዓመታት ትምህርት ማቋረጥ በቀላል የሚታይ አይደለም። ይሄን ኀይልን ማውገዝ ግድ ይላል፣ አባቶቻችን ሕዝብን እና ሀገርን ከጠላት ነው የተከላከሉት፤ ስለዚህ ሁሉም ለሰላም አስተዋጽኦ እንዲያደርግም ነው የጠየቁት።
፨
ማስፈንጠሪያውን (ሊንኩን) በመጫን NBC ኢትዮጵያን ይጎብኙ ይወዳጁ ![]()












