May 22, 2025
የቱሪዝም ሚኒስትር ሰላማዊት ካሳ እንደገለፁት፤ ባለፉት አምስት ዓመታት በመላ አገሪቱ ችላ ተብለው የቆዩ የባህል ቅርሶችን በመጠበቅና በመጠገን ረገድ ከፍተኛ ውጤት ተገኝቷል። ኢትዮጵያ እጅግ አስደናቂ የተፈጥሮና የባህል ቅርስ ባለቤት የሆነች ሀገር ናት ያሉት ሚኒስትሯ፤ ኢትዮጵያ በእውነትም የባህሎችና የመልክዓ ምድሮች ሞዛይክ ነች ብለዋል።
ዘርፉ ለረዥም ጊዜ ሊሰጠው የሚገባውን ትኩረት አለማግኘቱን ጠቅሰው፤ ከቅርብ ዓመታት ወዲህ የኢትዮጵያ መንግስት ቅርሶችን ለመጠበቅና ለማልማት ትኩረት ሰጥቶ እየሰራ መሆኑን ገልጸዋል። ቀደም ሲል ችላ ተብለው የቆዩ ቦታዎች አሁን ተጠብቀው ለህዝብ ክፍት መሆናቸውን በመግለጽ፤ አንድነት ፓርክና ብሔራዊ ቤተመንግስት ሙዚየምን ጨምሮ ሰፋ ያለ የባህል ቅርስ ልማት መሰራቱን ተናግረዋል።
የኢትዮጵያ ቅርስ ባለሥልጣን ዋና ዳይሬክተር ረዳት ፕሮፌሰር አበባው አያሌው በበኩላቸው፤ በቅርስ ጥበቃ ላይ ወሳኝ ምርምር ከሌለ የቅርስ ጥበቃ የዘፈቀደ ተግባር መሆኑን ጠቅሰው ሳይንሳዊ ምርምር በቅርስ ጥበቃ ውስጥ ቁልፍ ሚና እንደሚጫወት ገልጸዋል። ተመራማሪዎች ግኝቶቻቸውን ለማሰራጨት ምቹ መድረክ የሚፈጥር ሶፍትዌር እየተዘጋጀ መሆኑንም ተናግረዋል።
2ኛው የኢትዮጵያ ዓመታዊ የቅርስ ምርምር ጉባኤ “ምርምር ለቅርስ ጥበቃና ልማት” በሚል መሪ ሀሳብ እየተካሄደ ይገኛል።

፡፡ ፡፡ ፡፡












