፨ ፨ ፨ ፨ ፨ ፨
አዲስ አበባ | ሰኔ 22 2016| NBC ETHIOPIA-አዲስ አበባ የአፍሪካ መዲናነቷን የሚመጥኑ ስራዎችን ለመስራት እየተንቀሳቀሰ የሚገኘው አዲስ ሚዲያ ኔትዎርክ ተጨማሪ የቴሌቪዥን ቻናል በዛሬው እለት አስመርቋል።
“የትውልድ ድምፅን” መለያው ያደረገው ተቋሙ “AMN PLUS” የተሰኘ ተጨማሪ አማራጭ የቴሌቪዥን ቻናል፣ አዲስ መለያ እና በቅርቡ የሚጀምረውን “አዲስ ሲቲ ታለንት ሾው” በማስተዋወቅ ላይ ይገኛል።
ከ1985 ዓ.ም ጀምሮ በቴሌቪዥን፣ ሬዲዮ፣ ጋዜጣ እና በይነ መረብ ለአዲስ አበባ ነዋሪዎች መረጃና መሰናዶዎችን ሲያቀርብ የቆየው ተቋሙ ይዞታው ግን ከተማዋ የአፍሪካ መዲናነቷን የሚመጥን እንዳልሆነ የተቋሙ ዋና ስራ አስፈፃሚ ካሳሁን ጎንፋ በማስተዋወቂያ መርሃ ግብሩ ላይ ገልፀዋል።

ተቋሙና የከተማ አስተዳደሩ ሁኔታውን ለማሻሻል የአስር ዓመት ዕቅድ አውጥቶ እየተንቀሳቀሰ መሆኑን የገለፁት ዋና ስራ አስፈፃሚው የዛሬው መርሃ ግብር የውጤት አንዱ አካል መሆኑን ተናግረዋል።
በቴክኖሎጂና በሰው ሃይል ደርጅቶ ቀዳሚ የመዲናዋ የመረጃ ምንጭ እንዲሆን እየተሰራ መሆኑ የተገለፀ ሲሆን በአሁኑ ወቅት እየሰራባቸው ከሚገኙ አምስት የሃገር ውስጥ እና ሁለት የውጭ ቋንቋዎች በተጨማሪ ሶስት የሃገር ውስጥና የውጭ ቋንቋዎችን ለመጨመር በሂደት ላይ መሆኑ ተገልጿል።
የመዲናዋ ወጣቶች ተሰጧቸውን አውጥተው የሚያሳዩበትና አሸናፊዎች ተሸላሚ የሚሆኑበት “አዲስ ሲቲ ታለንት ሾው”ም የመዲናዋ ወጣቶችን ያማከለ ስራ ለመስራት እያደረገ ያለው ጥረት አካል ነው ተብሏል።

በመርሃ ግብሩ የአዲስ አበባ ከተማ ከንቲባ አዳነች አበቤ፣ የአዲስ አበባ ምክር ቤት አፈጉባኤ ቡዜና አልካድር እና የፌደራልና የአዲስ አበባ ከፍተኛ ሃላፊዎች ተኘኝተውበታል።
አዲስ አበባ ሶስተኛዋ የዲፕሎማቲክ መቀመጫ መሆኗን ያስታወሱት የአዲስ አበባ ከተማ ከንቲባ አዳነች አበቤ የሚመጥናት የመገናኛ ብዙሃን ሊኖራት የግድ እንደሚል ገልጸዋል።ከእዚህ ረገድ በ2023 ተመራጭ ሜትሮፖሊታን ሚዲያ ለመሆን የወጠነው አዲስ ሚዲያ ኔትወርክ ይበል የሚያሰኙ መሻሻሎችን እያሳየ ነው ብለዋል።

ተጨማሪ የቤት ስራዎች እንዳሉበት በመግለፅም እንደመርሁ የትውልድ ድምፅ እንዲሆን የተቋሙ ሰራተኞችና አመራሮችን አደራ ብለዋል። አስተዳደራቸውም የሚያደርገውን ድጋፍ እንደሚቀጥል ቃል ገብተዋል።
በ-መቅደስ ደምስ
YouTube – https://www.youtube.com/@NBCEthiopiaSC
TikTok – https://www.tiktok.com/@nbcethiopia
Website – https://nbcethiopia.com/news/
Telegram-https://t.me/nbcethiopiatv












