፨ ፨ ፨ ፨ ፨ ፨
አዲስ አበባ | ሰኔ 20 2016| NBC ETHIOPIA- የሚጥል በሽታ በነርቭ መታወክ የተነሳ ተደጋጋሚ የሆነ በሰዉነት ላይ ማንቀጥቀጥን፣ የጡንቻ መገታተርን እና ማርገፍገፍን የሚያስከትል በሽታ ነዉ።በሽታው በማንኛዉም የእድሜ ክልል ላይ የሚከሰት ሲሆን በአብዛኛዉ በልጆች እና አዛዉንቶች ላይ ይታያል፡፡ የአለም ጤና ድርጅት በአለም አቀፍ ደረጃ 50 ሚሊየን ሰዎች የሚጥል በሽታ እንዳለባቸው ይገልፃል፤ ድርጅቱ በአመቱ ቢያንስ 5 ሚሊየን ሰዎች ለሚጥል በሽታ ይዳረጋሉ ይላል፡፡
ቢቢሲ በጤና አምዱ ላይ ባወጣው መረጃ በዓለም የመጀመሪያው የሚጥል በሽታ መቆጣጠሪያ መሳሪያ በአንድ ታዳጊ ወንድ ልጅ ጭንቅላት ውስጥ ተገጥሟል ይላል፡፡
በከባድ የሚጥል በሽታ ለአመታት ሲሰቃይ የነበረው ታዳጊው ኦራን ኖውልሰን በራስ ቅሉ ውስጥ ህመሙን ለመቆጣጠር ያስችላል ተባለ መሳሪያ የተገጠመለት የመጀመሪያው ታካሚ ሆኗል፡፡

ኦራን ኖውልሰን ሌኖክስ-ጋስታውት ሲንድረም በተባለ የሚጥል በሽጣ ከሶስት አመቱ ጀምሮ ሲሰቃይ እንደነበር ወላጅ እናቱ ከቢቢሲ ጋር በነበራት ቆይታ ትገልፃለች፡፡
በጥቅምት ለንደን በሚገኘው ግሬት ኦርመንድ ስትሪት ሆስፒታል ኦራን የ12 አመት ታዳጊ ሳለ ቀዶ ጥገናው የተካሄደ ሲሆን በአሁኑ ወቅት በሙሉ ጤንነት ላይ እንደሚገኝ እናቱ አንስታለች፡፡ ኦራን አሁን 13 ዓመት ታዳጊ ሆኗል፡፡ጤንነቱም ላይ ለውጥ እንዳለ እናቱ ጀስቲን ትገልጻለች፡፡
በአንጎል ውስጥ የተገጠመለት እንደ ኤሌክትሮኒክስ መሣሪያ የሚያገለግለው ኒውሮስቲሙላተር የኤሌክትሪክ ምልክቶችን ወደ አንጎል ወይም ወደ ነርቭ ሥርዓትን የሚያደርስ ክፍል ነው፡፡ ህመምን ለመግታት ወይም የነርቭ በሽታዎችን ለማከም ኒውሮስቲሙላተር ከፍተኛ ሚናን ይጫወታል፡፡
ኦራን የመቆጣጠሪያ መሳሪያው በጭንቅላቱ ቅል ውስጥ ከተቀበረ በኋላ የኤሌክትሪክ ምልክቶችን ወደ አንጎል እና ሌሎች አካል ክፍሎች የሚልከው ኒውሮስቲሙላተር ታዳጊው ያለበትን የሚጥል በሽታ 80% ቀንሷል ይላል ቢቢሲ ያወጣው መረጃ።
ትውልደ እንግሊዚያዊው ኦራን መቆጣጠሪያ መሳሪያው ከተገጠመለት በኋላ ከፍተኛ ለውጦችን ማሳየት መቻሉ መሳሪያው ተስፋ ሰጪ እንደሆነ የሚያመላክት ነው እየተባለ ይገኛል፡፡
የኦራን እናት ጀስቲን መሳሪያው ከተቀበረ በኋላ ልጇ የበለጠ ደስተኛ መሆኑን እና በበሽታው ምክንያት ይወድቅ የነበረበት ጊዜ መቀነሱን ከቢቢሲ ጋር በነበራቸው ቆይታ ገልጸዋል፡፡
በጥቅምት ለንደን በሚገኘው ግሬት ኦርመንድ ስትሪት ሆስፒታል ኦራን የ12 አመት ታዳጊ ሳለ ቀዶ ጥገናው የተካሄደ ሲሆን በአሁኑ ወቅት በሙሉ ጤንነት ላይ እንደሚገኝ እናቱ አንስታለች፡፡

የሌኖክስ-ጋስታውት ሲንድሮም የሚጥል በሽታ ከ100 ሕፃናት ውስጥ 1 ወይም 2 ያህል እንደሚከሰት ጥናቶች ያሳያሉ፡፡ ህመሙ ከ3 እስከ 5 ዓመት በሚገኙ ልጆች ላይ በተደጋጋሚ የሚያጋጥም ነው፡፡ ሆኖም አልፎ አልፎ እስከ 18 ወራት ባለው ጊዜ እና እስከ 10 አመት እድሜ ድረስ ህመሙ ሊከሰት ይችላል፡፡
ለአመታት የልጅነት ጊዜውን ህመሙ ነጥቆታል የምትለው እናቱ ልጇን ላለማጣት ትንፋሹ እንደሚቋረጥ እና ችግሩ የከፋ እንዳይሆን የተለያዩ መድሀኒቶች በመስጠት ጊዜዋን ስታሳልፍ እንደነበር በማስታወስ የህመሙን አስከፊነት ትገልጻለች፡፡
በጣም ፈጣን የሶስት አመት ልጅ ነበረኝ የምትለው ጀሲቲን መታመም በጀመረ በጥቂት ወራት ውስጥ ብዙ ክህሎቶቹን ማጣቱን ትናገራለች፡፡ ኦራን ኦቲዝምን ጨምሮ ትኩረት ማጣት ችግር ያለበት ሲሆን የሚጥለው በሽታ ግን ከሁሉም የከፋው እንደሆነ መናገሯን ቢቢሲ በጤና አምዱ አስፍሯል፡፡ ለኦራን የተገጠመው መሳሪያ አንጎሉ ውስጥ ያሉ እንቅስቃሴዎች ለማስተካከል የሚረዳ ነው ተብሏል፡፡
ጀስቲን ልጇን በሙሉ ጤንነት ለማግኘት እንደምትፈልግ እና የልጇ የአመታት ስቃይ እንዲያበቃ ምኞቷ እንደሆነ ስምንት ሰአታት ከፈጀው ቀዶ ጥገና በፊት ለቢቢሲ ተናግራለች፡፡የሕፃናት የነርቭ ቀዶ ጥገና ዶክተር ማርቲን ቲስዳል እና ቡድኑ በኦራን የጭንቅላት ቅል ውስጥ የገጠሙት አዲሱን መሳሪያ 3.5 ሴንቲ ሜትር ስኩዌር እና 0.6 ሴንቲ ሜትር ውፍረት ያለው መሆኑን እና በራስ ቅሉ ውስጥ እንደሚገኝ ገልጸዋል።ጫፎቹም ከኒውሮስቲሙሌተር ጋር የተገናኙ ሲሆን በህክምና ሂደቱ ውስጥ ሊከስት የሚችለው የስህተት አጋጣሚ ከአንድ ሚሊሜትር ያነሰ እንደነበር ዶክተር ማርቲን አንስተዋል፡፡
ከዚህ ቀደም ጥልቅ የአንጎል ማነቃቂያ መሳሪያ የሚጥል በሽታ ላለባቸው ልጆች ተሞክሮ የነበረ ቢሆንም ኒውሮስቲሚተሮች በደረት ውስጥ ተቀምጠው ሽቦዎች ወደ አንጎል እንዲዘረጉ ያደርጉ እንደነበር የቀዶ ጥገባ ባለሙያው አስታውሰዋል፡፡ ይህም የህጻናቱን ስቃይ የሚያበረታ ነበር ብለዋል፡፡ አዲስ የተገጠመው መሳሪያ ግን ከቀዶ ጥገናው በኋላ ሊከሰቱ የሚችሉ ውስብስብ ችግሮች እና የኢንፌክሽን አደጋን እንደሚቀንስ ተስፋ እናደርጋለን ምክንያቱም የሚተከለው የራስ ቅሉ ውስጥ እንጂ በደረት ውስጥ አይደለም” ብለዋል ዶክተር ማርቲን፡፡
የመሣሪያውን ባትሪውን በየቀኑ በገመድ አልባ የጆሮ ማዳመጫዎቹ ቻርጅ ማድረግ የሚቻል ሲሆን ኦራን ወደ ቀድሞው ህይወቱ መመለሱ ተገልጿል፡፡
ኦራን እና ቤተሰቡን ቢቢሲ ከሰባት ወር በኋላ ለመመልከት ወደ መኖሪያ ቤታቸው ያቀና ሲሆን በኦራን ህይወት ውስጥ ትልቅ መሻሻል እንዳለ እና እጅግ ንቁ እንደሆነ እናቱ ጀሲትን ገልጻለች፡፡ ይህም አዲስ የህክምና ዜዴ በሚጥል በሽታ ለአመታት ለሚሰቃዩ ህጻናት እጅግ ተስፋ ሰጪ እንደሆነ ታምኗል፡፡












