፨ ፨ ፨ ፨ ፨
አዲስ አበባ | መጋቢት 27፣ 2016| NBC ETHIOPIA-ለሰው ልጆች መመሪያ ብሎም የህይወት ጎዳና ይሆን ዘንድ ከሰማይ ወደ ምድር የተወረዱ በርካታ ቅዱሳን መጽሀፍት ይገኛሉ፡፡
በእስልምና ሀይማኖት አስተምህሮ መሰረት ወደ ምድር ከወረዱ ሰማያዊ መጽሐፍት መካከል ዘቡር፣ ተውራት፣ ኢንጂል፣ ሱሁፍ እንዲሁም ቁርዓን ይጠቀሳሉ፡፡
ከነዚህም መካከል በነብዩ ሙሃመድ ላይ የወረደው ቁርዓን የመጨረሻው ሰማያዊ ቅዱስ መጽሀፍ ነው፡፡
ቁርዓን 114 ምዕራፎች፣604 ገጾች፣6ሺህ 3መቶ 48 አናቅጾች፣87ሺህ 5መቶ 30 ቃላት እንዲሁም 325ሺህ 3መቶ 84 ፊደላት አሉት፡፡
ቁርዓን በነብዩ ሙሃመድ ላይ ለመጀመሪያ ጊዜ መውረድ የጀመረው ሂራ በተባለ ዋሻ ውስጥ ባለንበት የረመዳን ወር ነበር፡፡
ከዛም በተለያዩ ጊዜያትና ቦታዎች በፈረንጆቹ ከ609 እስከ 632 ባሉት 23 አመታት ውስጥ ወርዶ ተጠናቋል፡፡

በቀደመው ጊዜ ቁርዓን ሲወርድ በቆዳ ላይ፣ በድንጋይ ላይ እንዲሁም በተለያዩ መንገዶች ይመዘገብ የነበረ ሲሆን በቃል መሸምደዱም አንዱ የመመዝገቢያ አማራጭ ነበር፡፡
ቁርዓን በዚህና መሰል መንገድ ሲመዘገብ ቆይቶ ከነብዩ ህልፈት በኋላ በአቡበክር የአስተዳደር ዘመን ይደርሳል፡፡
በሳቸው የአስተዳደር ዘመንም በተከሰተ አንድ ጦርነት ቁርዓንን በቃላቸው ሸምድደው የያዙ በርካታ የነብዩ ባልደረቦች በዚህ ጦርነት ህይወታቸው ያልፋል፡፡
ይህንን ያስተዋሉት የወቅቱ አስተዳዳሪ አቡበክር ሲዲቅ ቁርዓን እንዳይጠፋ በመስጋት በተለያዩ መንገዶች ተመዝግበው የተቀመጡ የቁርዓን አንቀጾች በአንድ እንዲሰበሰቡ ያደርጋሉ፡፡
ከዛም በመቀጠል የተሰበሰቡት የቁርዓን አንቀጾች ትክክለኛነት ለማረጋገጥም ቁርዓንን በቃላቸው የሸመደዱና በህይወት የሚገኙ ሰሃባዎች እንዲያረጋግጡት ካደረጉ በኋላ በአንድ ጥራዝ እንዲቀመጥ ማድረግ ቻሉ፡፡
ይሄኔ ነበር ቁርዓን ለመጀመሪያ ጊዜ በአንድ ጥራዝ አንድ ላይ ተሰብስቦ መቀመጥ የቻለው፡፡
ከአመታት በኋላም ሶስተኛው አስተዳዳሪ ኡስማን ቢን አፋን በአንድ ጥራዝ የተቀመጠውን ቁርዓን ወደ አራት በማብዛት አንዱን እሳቸው ጋር በማስቀመጥ የተቀሩትን በእስልምና አስተዳደር ስር ለሚገኙ ሀገራት መሪዎች አንድ አንድ ቅጂ ላኩ፡፡
ከዚህ በኋላ ነበር ቁርዓን በከፍተኛ ፍጥነትና ቁጥር ታትሞ በአለም ዙሪያ ለሚገኙ ሙስሊሞች መድረስ የቻለው፡፡
አሁን ላይ ቅዱስ ቁርዓን በአለም ዙሪያ ከ800 ሚሊየን በላይ የቁርዓን ቅጂዎች እንደሚገኙ ይታመናል፡፡

በአለም ዙሪያ ሙሉውን ቁርዓን በቃላቸው ሸምድደው የያዙ ደግሞ ከ2 ነጥብ 5 ሚሊዮን በላይ ሀፊዞች እንደሚገኙ አንዳንድ መረጃዎች ይጠቁማሉ፡፡
ቁርዓንን አትመው የሚያሰራጩ ማተሚያ ቤቶች በአሁኑ ወቅት በርካታ ቁጥር ያላቸው ሲሆን የሚያትሙበት መንገድ በአብዛኛው ተመሳሳይ ነው፡፡
የቁርዓን ህትመት የመጀመሪያ ተግባር ቃላቶቹን በእጅ ጽሁፍ ማስፈር ነው፡፡
በመቀጠል ደግሞ ይህ በእጅ የሰፈሩት የቁርዓን ቃላትን ወደ ዲጂታል እንዲቀየሩ ይደረጋል፡፡
ከዛም በመቀጠል ወረቀት የህትመቱ አካል መሆን ይጀምራል፡፡ወረቀቱ ከተለመዱት አሊያም ከምናውቃቸው የወረቀት አይነቶች የተለየ ነው፡፡ወረቀቱም ወደ ማተሚያው ማሽን እንዲሄድ ይደረጋል፡፡
ወደ ማተሚያ ማሽኑ የገባው ወረቀትም ያወጣውን የቁርዓን ፊደላትን በትክክል ያለ ምንም እንከን ያወጣ መሆኑ በቁርዓን አዋቂዎች ይገመገማል፡፡
900 ሺህ የቅዱስ ቁርኣን ገፆች ወደ ዋናው የክትትል ቡድን ሲሄዱ ከነዚህም መካከል የክትትል ቡድኑ ከታተሙት መካከል በማንሳት ናሙናዎች በመውሰድ ይገመግማል፡፡
በዚህም ግምገማ የተዘለለ አሊያም የተዛባ ቃልም ሆነ ፊደል ካለ እንዲወገድ ይደረጋል፡፡
በዚህ መልኩ የጥራት ደረጃውን ጠብቆ የታተመው ቁርዓን ወደ ተለያዩ ሀገራት ይሰራጫል፡፡












