አዲስ አበባ | የካቲት 14፣ 2016| NBC ETHIOPIA -አድዋ የመስዋዕትነት ጮራ ነው፡፡ በቅኝ ግዛት ቀንበር ስር ለነበሩ ለመላው ጥቁር ህዝቦች ታላቅ መነቃቃትን የፈጠረ፤ በጦር ሜዳ ላይ ነጮች በፍጹም በጥቁሮች አይሸነፉም የሚለውን የተሳሳተ አመለካከት አፈር ድሜ ያስበላ አኩሪ የነጻነት የተጋድሎ ታሪክ ነው… አድዋ፡፡
በአድዋ ጦርነት ላይ ከ120 ሺህ በላይ ገበሬዎች በውጊያው ላይ ተሳትፈዋል፡፡ ከተለያዩ የኢትዮጵያ አካባቢዎች የመጡ አገረ ገዢዎችና የጦር አዛዦች በመካከላቸው ያለውን ቅራኔ ወደ ጎን በመግፋት አንድ ሆነው ለአንድ አላማ ጎን ለጎን ተሰልፈዋል፡፡

ንጉስ ተክለሀይማኖት ተሰማ ጎሹ (አባ ጠና) በአድዋ ጦርነት ላይ ታላቅ ተጋድሎን ከፈጸሙ ታዋቂ የኢትዮጵያ የጦር መሪዎች መካከል አንዱ ናቸው፡፡
ንጉሥ ተክለሀይማኖት ከአባታቸው ተሰማ ጎሹ እና ከእናታቸው ምዕላድ ነገዷ በ1843 ዓ.ም ጎጃም ውስጥ እንደተወለዱ የተለያዩ ጸሀፍቶች በጽሁፎቻቸው ገልጸዋል፡፡
ተክለኢየሱስ ዋቅጅራ “የኢትዮጵያ ታሪክ” በተሰኘው መጽሃፋቸው ንጉሱ ወደ ስልጣን የመጡት በአጼ ዮሐንስ ዘመነ መንግስት ጥር 13 ቀን 1873 ዓ.ም በደብረ ታቦር ከተማ ‹‹ንጉሠ ከፋ ወጎጃም›› ተብለዉ የሸዋው ንጉስ ምኒልክ በተገኙበት ነው ይሉናል፡፡
ንጉሥ ተክለሀይማኖት አብዛኛው ህይወታቸው በጦርነት የተሞላ ነው፡፡ ራስም፣ ንጉስም ሆነው በርካታ ፈተናዎች አስተናግደዋል፡፡
ራስ እያሉ ከጎጃም የስልጣን ተቀናቃኞቻቸው እንዲሁም ከኢትዮጵያ ጠላቶች ጋር ተፋልመዋል፡፡ ጠላት ድንበር ጥሶ የኢትዮጵያን መሬት ለመውረር ያደረጋቸውን ሙከራዎች ለመቀልበስ ከሌሎች ኢትዮጵያውያን ጋር በመሆን ጠላትን ተፋልመዋል፡፡ ከእነዚህ ውስጥ ሁለቱ በግንበር ቀደምትነት ይጠቀሳሉ፡፡
የመጀመሪያው ጦርነት የሱዳን ደርቡሾች የኢትዮጵያን ድንበር ተሻግረው ጥር 10 ቀን 1880 ዓ/ም ጎንደር ድረስ በመግባት ቤተክርስቲያን አቃጥለው ቀሳውስቱን ሲገሉ በወቅቱ አጼ ዮሐንስ አስመራ ነበሩ፡፡ ይህንን የሰሙት ንጉስ ተክለሀይማኖት አንድ መቶ ሺህ ሰራዊታቸውን ይዘው በመሄድ ደርቡሾች ላይ ከፍተኛ ድል አስመዝግበዋል፡፡ በወቅቱ ለጦርነቱ እንዲህም ተብሎ ተገጥሞ ነበር ይባላል፦
“ተከተልኸኝ ብዬ ዞሬ ዞሬ ሳይ፣
ወይ ጥጋብ ወይ ኩራት ጎንደር ቀረህ ወይ?
ወገራ አሳላፊ ደንቢያ እንጀራ ጣይ፣
ተበላህ ጎንደሬ አትነሳም ወይ?”

ኢጣሊያ ከውጫሌ ውል ጋር በተያያዘ ከኢትዮጵያ መንግስት ጋር ወደ ውጥረት በገባችበት ዘመን ጦሩዋን ከጠረፋማ የባህር ዳርቻዎች በጥልቀት ወደ ኢትዮጰያ መሬቶች በመግባት አንዳንድ ስትራቴጂካዊ ጠቀሜታ ያላቸውን ቦታዎችን በማን አለብኝነት መቆጣጠር ጀመረች፡፡
በወቅቱ ኢትዮጵያ ለግጭቱ ሰላማዊ መፍትሄ ለማፈላለግ በተደጋጋሚ መልዕክተኞችን ልካ ነበር፡፡ ሆኖም ግን የወራሪው ሀይል አላማ ሌላ ነውና በድርጊቱ ገፋበት፡፡ በ1887 ዓ.ም በጄኔራል ኦረሬ የሚመራው የኢጣሊያ ጦር ወደ ኢትዮጵያ በመግባት አድዋን ተቆጣጠር፡፡
ጥቅምት 2 ቀን 1888 ዓ.ም አፄ ምኒልክ የክተት አዋጅ በማወጅ አቅም ያለው ሁሉም ኢትዮጵያዊ ውጫሌ ላይ እንዲከት አዘዙ፡፡ በፍጥነት የተሰባሰበው ጦርም ወደ ወረኢሉ ተመመ፡፡
ኢጣሊያኖች ጦርነቱ አይቀሬ መሆኑ በመገንዘባቸውም የየአካባቢው ገዚዎችን በመሸምገል ወደ ግንባር እንዳይሄዱ ጎትጉተዋል፡፡ ሆኖም ግን አብዛኛዎቹ አገራቸውን አሳልፈው አልሰጡም፡፡
አፄ ምኒልክ ወደ አድዋ ከመዝመታቸው በፊት ጣልያን ብዙ መኳንንቶችን ጥላቻ እንዲዘራባቸው ጥረት ሲያደርግ፤ አውግስቶ ሳልምቢኒ ጎጃም ዉስጥ ተቀምጦ የንጉስ ተክለሃይማኖት አጋዥ በመመስል የኢጣሊያንን ጦር ቢደግፉ በአጼ ምኒልክ ቦታ እሳቸው እንዲቀመጡ እንደሚያደርግ ሲወተውት ቆይቶ ነበር፡፡
ንጉስ ተክለሃይማኖት ግን ጉዳዩን ችላ ብለው የክተት ጥሪውን ተቀብለው፤ ከ3 ሺህ በላይ ሰራዊት ይዘው ወደ አድዋ ገስግሰዋል፡፡ ንጉስ ተክለሃይማኖት ከአድዋ ጦርነት ጋር በተያያዘ ደማቅ ታሪክ አላቸው፡፡
እንደ ቤርክሊን ገለጻ ከሆነ ደግሞ ከጎጃም በአጠቃላይ 20 ሺህ ህዝብ የዘመተ ሲሆን፣ ፈረሰኛው 8 ሺህ፣ የጦር መሣሪያ የያዘ 11 ሺህ፣ ተከታይ 2 ሺህ ነበር ይላል ቤርክሊን አድዋን አስመልክቶ በፃፈው ፅሁፉ፡፡
መኳንንቶቹ ለጦርነት ዘመቻው ሰራዊታቸውን እየያዙ ወደአፄ ምኒልክ ሲያቀኑ ንጉስ ተክለሃይማኖት ዘግይተውም ቢሆን ታህሳስ 15 በበጌምድር በኩል አድርገው ከንጉሱ ጋር ተገናኝተዋል፡፡
በአገር ውስጥ በነበረው የስልጣን ሽኩቻ ንጉስ ተክለሃይማኖት ከአፄ ምኒልክ ጋር ቅራኔ ቢኖራቸውም በአገር ጉዳይ ወደ ኋላ አይሉምና በአንድ ላይ ቆመዋል፡፡
እንደሌሎቹ የጦር መሪዎች ሰራዊታቸውን አስተባብረው ስንቅ ከማዘጋጀት አንስቶ ጦርነቱን በመዋጋት ለድሉ መገኘት ሚናቸው የላቀ ነው፡፡
ንጉስ ተክለሃይማኖት ራስ አዳል ተሰማ ተብለው ከ1861-1872 ዓ/ም፤ ንጉሥ ተክለ ሀይማኖት ተብለው ከ1873-1893 ዓ/ም በድምሩ ለ32 ዓመት ጎጃምን አስተዳድረዋል፡፡እኚህ ጀግና ጥር 3 ቀን በ1893 ዓ.ም ከዚህች አለም በሞት ተለይተዋል፡፡
በ-ሰላም ይልማ












