አዲስ አበባ | ታህሳስ 22 ፤ 2016| NBC ETHIOPIA- የሰቆጣ ቃል ኪዳን የ2015 ዓ.ም አፈፃፀም ግምገማ፤ የ2016 ዓ.ም እቅድ ማጸደቂያ፤ የምግብ ስርዓት ትራንስፎርሜሽን ማስተዋወቂያ መድረክ ምክትል ጠቅላይ ሚኒስትር እና የውጭ ጉዳይ ሚኒስትር ደመቀ መኮንን፣ የጤና ሚኒስትር ዶ/ር ሊያ ታደሰ ፣ የክልል ርዕሳነ መስተዳድሮች፣ የየክልሉ የግብርና ሚኒስትሮች እና የፌዴራል ሚኒስትሮች በተገኙበት በመካሄድ ላይ ነው።

በመድረኩ ቅንጅታዊ አሰራር ተዘርግቶ ወደ ስራ ከተገባ በኋላ፥ ጤና ሚኒስቴር እና የግብርና ሚኒስቴር ከምግብና ስርዓተ ምግብ ተባባሪ ሴክተር መስሪያቤቶች እና አጋር ድርጅቶች ጋር በመተባበር በርካታ ተግባራት መከናወናቸው ተብራርቷል።
በውይይቱ በ40 ወረዳዎች የነበረውን የሰቆጣ ቃል ኪዳን የሙከራ ምዕራፍ ከ2014 ዓ.ም ጀምሮ ወደ 240 ወረዳዎች በማስፋት እየተገበረ መሆኑ ተገልጿል።
ከኢትዮጵያ ህብረተሰብ ጤና ኢንስቲቲዩት እና IFPRI ጋር በተካሄደው የተጽዕኖ ግምገማ ጥናት በ2014 ዓ.ም ብቻ 59ሺ 717 ህጻናትን ከመቀጨር ፣ 2ሺ 904 ልጆችን ከሞት መታደግ እንደተቻለ ተብራርቷል፡፡
በኢትዩጵያ የሚታየው የመቀንጨር ችግር ከግዜ ወደ ግዜ መሻሻሎች ቢያሳይም ፥ 39 በመቶ የመቀንጨር፣ 11 በመቶ የመቀጨጭ ችግር እድሜያቸው ከ አምስት አመት በታች በሆኑ ህጻናት ላይ እንደተከሰተ ተመላክቷል።
በቀጣይ ከ2016 እስከ 2018 ዓ.ም ይህን ፕሮግራም በ700 ወረዳዎች በማስፋት ከ5 ሚሊዮን በላይ ህፃናትን ከመቀንጨር ለመታደግ የሁሉም ርብርብ ይሻል ተብሏል።

የትግበራ ዕቅዱን በስራ ላይ ለማዋል ክልሎች፣ ከተማ መስተዳደሮች እና አጋር አካላት የገንዘብ ድጋፍ ሊያደርጉ እንደሚገባ ተጠቁሟል።
የ2015 ዓ.ም የሰቆጣ ቃል ኪዳን እቅድ አፈፃፀም ግምገማና የ2016 ዓ.ም እቅድና በጀት ማፀደቅ፤ የምግብ ስርዓት ትራንስፎርሜሽን ማስተዋወቅ ፍኖተ ካርታና ሀገራዊ ዳሰሳን ማስተዋወቅ፤ የምግብ ስርዓትን እና ስርዓተ ምግብ ትግበራን ቅንጅታዊ አሰራርን ለማጠናከር ምክር ቤት ለማቋቋም እና በክልሎች ደረጃ የተከናወኑትን እና የአመራሩን ክትትል የሚሹ ጉዳዮች ላይ በውይይቱ ትኩረት የተደረገባቸው ጉዳዮች ናቸው።
ዕድሜያቸው ከሁለት ዓመት በታች በሆኑ ህጻናት ላይ የሚከሰተውን የመቀንጨር ችግር በ2022 ዓ.ም ዜሮ ለማድረግ በ2007 ዓ.ም የሰቆጣ ቃልኪዳን ፕሮግራም ይፋ መደረጉ ይታወሳል።
ቃልኪዳኑ በሰቆጣ ከተማ በምክትል ጠቅላይ ሚኒስትር እና የውጭ ጉዳይ ሚኒስትር ደመቀ መኮንን እንዲሁም የክልል ርዕሰ መስተዳድሮች እና የከተማ ከንቲባዎች በተገኙበት በነሐሴ 2007 ዓ.ም በሰቆጣ ከተማ ነበር የተፈረመው።
በወቅቱ ከ7.8 ሚሊዮን በላይ የሚሆኑ ሕጻናትን በ15 ዓመት ከመቀንጨር ለመታደግ ሀገራዊ ቃልኪዳን ተገብቷል፡፡
በሰላማዊት ወንድወሰን
YouTube – https://www.youtube.com/@NBCETHIOPIA
TikTok – https://www.tiktok.com/@nbcethiopia
Website – https://nbcethiopia.com/news/
Facebook -https://www.facebook.com/ethiopiannbc/












