አዲስ አበባ፣ ነሃሴ 08/2015፣ NBC ETHIOPIA -በናይጄሪያዋ ዛሪያ ከተማ በጁምዓ ጸሎት ወቅት ጥንታዊ መስጅድ ተደርምሶ የ7 ሰዎች ሕይወት ማለፉ ታውቋል።

አደጋው አርብ ነሐሴ 5/2015 ዓ.ም የደረሰ ሲሆን በደረሰበት ወቅት በመቶዎች የሚቆጠሩ የእስልምና እምነት ተከታዮች በመስጅዱ ውስጥ ጸሎት ላይ ነበሩ። በአደጋው ሕይወታቸውን ካጡት በተጨማሪ በበርካቶች ላይ ጉዳት መድረሱን ቢቢሲ ዘግቧል።
የአካባቢው ባለስልጣናት በጸሎት ወቅት የተደረመሰው መስጅድ ዕድሜው በመቶዎች የሚቆጠር መሆኑን እና መስጅዱ በ1830ዎቹ የተገነባ መሆኑን ገልፀዋል።
የዛሪያ ከተማ እስላማዊ ምክር ቤት ቃል አቀባይ የሆኑት አብዱላሂ ክዋራባይ ቀድሞ የአራት ሰዎች አስክሬን መገኘቱን በመቀጠል ደግሞ የነብስ አድን ሠራተኞች ከፍርስራሽ ስር የተጨማሪ ሦስት ሰዎች አስክሬንን ማውጣቱን ገልጸዋል ።
ቃል አቀባዩ አደጋው ከመድረሱ አንድ ቀን ከቀደም ብሎ በጥንታዊው መስጅድ ግድግዳ ላይ የታየውን መሰንጠቅ ለመጠገን የመሃንዲሶች ቡድን ተቋቁሞ ነበር ብለዋል።
በናይጄሪያ በሕንጻዎች መደርመስ የሰዎች ሕይወት ማለፍ ዜና አዲስ ነገር አይደለም። ባለፈው ዓመት ብቻ በምዕራብ አፍሪካዊቷ አገር ከ36 ያላነሱ ሕንጻዎች ተደርምሰው ነበር።
በሃና ተሰማ
YouTube – https://www.youtube.com/@NBCETHIOPIA
TikTok – https://www.tiktok.com/@nbcethiopia
Facebook-https://www.facebook.com/ethiopiannbc












