አዲስ አበባ ሐምሌ 7፤ 2015 | NBC ETHIOPIA- በሃገሪቱ ዋና ዋና ተፋሰሶች ከባድ መጠን ያለው እርጥበት ስለሚኖር በተፋሰሶቹ ውስጥ በሚገኙ ለጎርፍ ተጋላጭ ቦታዎች ላይ ቅጽበታዊ ጎርፍ እና የወንዞች ከገደብ በላይ መሙላት ሊከሰት እንደሚችል የኢትዮጵያ ሚቲዎሮሎጂ ኢንስቲትዩት አስታውቋል።

የኢትዮጵያ ሚቲዎሮሎጂ ኢንስቲትዩቱ ለኢትዮጵያ ፕሬስ ድርጅት በላከው መግለጫ እንዳስታወቀው በዓባይ ተፋሰስ፤ በባሮ አኮቦ እና በአዋሽ ተፋሰስ አካባቢዎች ላይ ከባድ መጠን ያለው እርጥበት ሊኖር እንደሚችል ትንበያዎች አመላክተዋል። በዚህ ምክንያትም በተለይም በተፋሰሶቹ ውስጥ በሚገኙ ለጎርፍ ተጋላጭ ቦታዎች ላይ ቅጽበታዊ ጎርፍ እና የወንዞች ከገደብ በላይ መሙላት ሊከሰት ስለሚችል ጥንቃቄ ሊደረጉ እንደሚገባ አስታውቋል።
በተለይ በመጪዎቹ ስድስት ቀናት የወንዞች ሙላት እና ጎርፍና እንዲሁም በረባዳ ቦታዎች ላይ የሚተኛ ውኃ ጉዳት ሊያስከትል ስለሚችል ኅብረተሰቡ ቅድመ ጥንቃቄ ማድረግ እንዳለበት ሲል አሳስቧል።
በተመሳሳይ በሚቀጥሉት ስድስት ቀናት የክረምት ዝናብ ተጠቃሚ የሆኑት ኦሮሚያ፣ አዲስ አበባ፣ አማራ፣ ትግራይ፣ የጋምቤላ፣ ቤንሻንጉል፣ ደቡብ፣ ደቡብ ምዕራብ እና ሲዳማ ክልሎች የተጠናከረ ዝናብ እንደሚያገኙ በመግለጫው አስገንዝቧል።
ይህም ለመኸር ሰብሎች እና ለቋሚ ተክሎች የውኃ ፍላጎትን ከማሟላት አንጻር አዎንታዊ ጎን ይኖረዋል ብሏል። በአንጻሩ በአንዳንድ ቦታዎች ከሚጠበቀው ከባድ ዝናብ ጋር ተያይዞ በሰብል ማሣ ላይ በመተኛት የሰብሎችን መደበኛ ዕድገት ከመግታት አንጻር እና የበልግ የድህረ ሰብል ስብሰባ ላይ አሉታዊ ጎን ሊኖረው ስለሚችል አስፈላጊው ጥንቃቄና ተገቢ እርምጃ መውሰድ እንደሚገባ አሳስቧል።
የባሌ ዞን፣ ምሥራቅ ሐረርጌ፣ ድሬዳዋና ሐረሪ፣ የጅጅጋ፣ የሲቲና የፋፈን ዞኖች ከአፋር ክልል ዞን 3 እና 5 በተወሰኑ ሥፍራዎቻቸው ላይ አነስተኛ መጠን ያለው ዝናብ እንደሚያገኙ የትንበያ መረጃዎች እንደሚያሳዩ ኢንስቲትዩቱ ገልጿል።
በሌላ በኩል ከሚጠበቀው አነስተኛ እርጥበት አንጻር ለአርብቶ አደርና ከፊል አርብቶ አደር አካባቢዎች የመጠጥ ውሃ አቅርቦትንም ሆነ የግጦሽ ሳር ልምላሜን ከመጨመር አኳያ አዎንታዊ ሚና ቢኖረውም የእርጥበት ችግሩ እንዳይባባስ የሚገኘውን የዝናብ ውሃ በማቆርና የሚመለከታቸው አካላት አስፈላጊውን ጥንቃቄና ተገቢ እርምጃ እንዲወሰድ ጠቁሟል።
YouTube – https://www.youtube.com/@NBCETHIOPIA
TikTok – https://www.tiktok.com/@nbcethiopia
Facebook-https://nbcethiopia.com/news/
#NBC_ETHIOPIA
#ሆኖ_መገኘት










