
በደቡባዊ ጣሊያን ባሕር ዳርቻ ስደተኞችን አሳፍራ ስትጓዝ በሰጠመችው ጀልባ ምክንያት የሞቱት ሰዎች ቁጥር ከ100 በላይ ሊሆን እንደሚችል ተሰግቷል።
በደቡባዊ ጣሊያን የባሕር ዳርቻ አቅራቢያ እሁድ ዕለት በደረሰው በዚህ አደጋ በርካታ ሕጻናትን ጨምሮ አስካሁን 62 ሰዎች መሞታቸው ተረጋግጧል።
ካላብሪያ ከተባለችው የባሕር ዳርቻ የመዝናኛ ክልል አቅራቢያ በአደጋው የሞቱ ሰዎች አስከሬን የተገኘ ሲሆን፣ ከሟቾቹ መካከልም አንድ ጨቅላን ጨምሮ 12ቱ ልጆች መሆናቸው ተዘግቧል።
የጣሊያን ባለሥልጣናት በጀልባዋ ተሳፍረው ከነበሩት መካከል የደረሱበት ያልታወቀ በመኖራቸው የሟቾች ቁጥር ከፍ ሊል ይችላል ሲሉ ስጋታቸውን ገልጸዋል።
በጀልባ ተሳፍረው የነበሩ ሰዎች ቁጥር እስካሁን በትክክል አልታወቀም። በጀልባዋ ተሳፍረው የነበሩ እና በሕይወት የተረፉ ስደተኞች ግን ጀልባዋ ላይ 150 ሰዎች ተሳፍረው ነበር ብለዋል።
አደጋው ወደ አጋጠመበት ካላባሪያ ግዛት የተጓዙት የጣሊያን የሀገር ውስጥ ጉዳዮች ሚኒስትር ማቴዎ ፒአንቴዶሲ ቢያንስ እስከ 30 ሰዎች የደረሱበት አልታወቀም ብለዋል።
የጣሊያን የባሕር ዳርቻ ጠባቂዎች 80 ሰዎች በሕይወት መገኘታቸውን ገልጸዋል።
ጀልባዋ ከበርካታ ቀናት በፊት የአፍጋኒስታን፣ የፓኪስታን፣ የሶማሊያ እና የኢራን ዜጎችን አሳፍራ ከቱርክ ስለመነሳቷ ተገልጿል።
በየዓመቱ በብዛት ከአፍሪካ የሆኑ ከፍተኛ ቁጥር ያላቸው ስደተኞች ግጭት እና ድህነትን በመሸሽ በጀልባ ጣሊያን ለመድረስ ጥረት ያደርጋሉ።
ጀልባዋ በአስቸጋሪ የአየር ጠባይ ውስጥ እየቀዘፈች ሳለ ከድንጋይ ጋር ከተጋጨች በኋላ ስለመስጠሟ ተገልጿል።
ከጀልባ መስጠም በኋላ አንድ ግለሰብ ከሕገ-ወጥ የሰዎች ዝውውር ወንጀል ጋር በተያያዝ በቁጥጥር ሥር ውሏል።
የጣሊያን ጠቅላይ ሚኒስትር ጆርጂያ ሜሎኒ በአደጋው የተሰማቸውን ሐዘን ገልጸው፤ ለአደጋው ሕገ-ወጥ የሰዎች አዘዋዋሪዎችን ተጠያቂ አድርገዋል።
አደጋውን ተከትሎ የአውሮፓ ኅብረት ኮሚሽን ፕሬዝዳንት እንዲሁም ፖፕ ፍራንሲስ የተሰማቸውን ሐዘን ገልጸዋል።
የሮማ ካቶሊካዊት ቤተ ክርስትያን ርዕሰ ሊቃነ ጳጳሳት አቡነ ፍራንሲስ፤ “ለጠፉትና በሕይወት ለተረፉት ለእያንዳንዳቸው ስደተኞች እፀልያለሁ” ብለዋል። አያይዘውም ስደተኞቹን ላተረፉና በሕይወት የተረፉትንም ለሚቀበሉ ፀሎት እያደረጉ እንደነበር ተናግረዋል።
በሃና ተሰማ
ምንጭ(ቢቢሲ)
#NBC_ETHIOPIA
#ሆኖ_መገኘት










