፨ ፨ ፨ ፨ ፨
አዲስ አበባ | ግንቦት 20 2016| NBC ETHIOPIA- ለዓለም ደህንነት ትልቅ የራስ ምታት ከሆኑት መካከል የሚጠቀሰው የሳይበር ጥቃት በርካታ ኢኮኖሚያዊ፣ ፖለቲካዊና ማህበራዊ ቀውሶችን ሲያስከትል ሰንብቷል፣ እያስከተለም ይገኛል፣ ቀጣይነት እንደሚኖረውም ይጠበቃል፡፡
መቀመጫውን በዩናይትድ ኪንግደም ያደረገው Pentest People የተሰኘው ድህረገጽ ዓለም እስከዛሬ ካስተናገደቻቸው የሳይበር ጥቃቶች በአደጋኛነታቸው ከአንድ እስከ አምስት ያስቀመጣቸውን እንመልከት፡፡
በጎርሮሳውያኑ ግንቦት 2017 በአብዛኛው የዓለም ክፍል በሚገኙ የንግድና የተለያዩ ተቋማት ላይ የደረሰው የሳይበር ጥቃት በዓለማችን ከደረሱ እጅግ አደገኛ አምስት የሳይበር ጥቃቶች መካከል በቀዳሚነት ይጠቀሳል፡፡ “The WannaCry Ransomware Attack” በሚል የሚታወቀው ጥቃቱበ150 ሀገራትበሚገኙ ከ200 ሺህ በላይ ኮምፒውተሮች ላይ የተቃጣ ነበር፡፡

ጥቃቱ በአይነቱ ያልተለመደ ስለነበር በርካታ ድርጅቶች ለእንዲህ አይነቱ ጥቃት በጭራሽ ዝግጁ አልነበሩም፡፡ ከአንዱ ኮምፒውተር ወደሌላኛው ኮምፒውተር በቀላሉ የሚሰራጭ በመሆኑም በፍጥነት ለመዳረስ ጊዜ አልፈጀበትም ነበር፡፡ እንደ እድል ሆኖ አንድ የደህንነት ተመራማሪ ስርጭቱን የሚገታ መፍትሄ በማግኘቱ ከበለጠ ውድመት ዓለምን ማትረፍ ተችሏል፡፡ በጥቃቱ የደረሰውን ውድመት ማከም ግን አልተቻለም፡፡
በአደገኛነቱ የሁለተኛ ደረጃ ላይ የተቀመጠው የNotPetya ቫይረስ ነው። ሰኔ 2017 ያጋጠመው ቫይረሱ በፍጥነት ነበር በመላው ዓለም የተሰራጨው፡፡

ቫይረሱ ሰዎችን በማታለል ኮምፒውተሮቻቸውን ለብሽት የሚዳርግና ያለፍቃዳቸው ኮምፒውተራቸውን ሌሎች እንዲጠቀሙት የሚያደርግ ሶፍትዌር ኮምፒውተሮቻቸው ላይ እንዲጭኑ የሚያደርግ ነበር፡፡
NotPetya ቫይረስ ያላጠቃው የንግድ አይነት እንደሌለ ይነገርለታል፡፡ ቫይረሱ መጀመሪያ ላይ በዩክሬን በተለመደ አንድ የሂሳብ ሶፍትዌር አማካኝነት በመሰራጨቱ በተለይ የዩክሬን ድርጅቶች ክፉኛ ተጠቅተዋል፡፡ በመቀጠል በመላው ዓለም የተዳረሰው ቫይረሱ ያስከተለው የሳይበር ጥቃት በቢሊዮን የሚቆጠር ዶላር ጉዳት እንዲደርስ ምክንያት ሆኗል፡፡
ኮምፒውተሮቻቸው በቫይረሱ የተጠቃባቸው ሰዎች ኮምፒውተሮቻቸው ላይ ያሉ መረጃዎችን እንዳያገኙ አድርጓቸዋል፡፡ በእዚህ ሳቢያ በርካታ የንግድ ድርጅቶች ለመዘጋት ተገደዋል። በጥቃቱ መረጃዎቻቸው የጠፋባቸው ግለሰቦች መልሰው መረጃቸውን ማግኘት አለመቻላቸው የNotPetya ቫይረስ ጉዳቱን የከፋ አድርጎታል፡፡
ስለጥቃቱ ዓላማ ግን እስካሁን በግልጽ የታወቀ ነገር የለም፡፡ አንዳንዶች በመረጃ ጦርነት ሳቢያ የተፈጠረ ነው ሲሉ ሌሎች ደግሞ አላማውን በሳተ ቀልድ የተፈጠረ ነው ባይ ናቸው፡፡
የNotPetya ቫይረስ አለምን ባስጨነቀበት አመት የተከሰተው የEquifax Data Breach ሌላኛው የዓመቱ ድርብ ፈተና ነበር፡፡

የሳይበር ጥቃቱ የደረሰው በአሜሪካ ሸማቾች እና ንግዶች፣ የንግድ ማንነት እና የማጭበርበር መፍትሄዎች የፋይናንስ ግብይት እንዲሁም የትንታኔ አገልግሎቶችን የሚሰጠው Equifax ኤጀንሲ ላይ ነበር፡፡
147.9 ሚሊዮን አሜሪካውያን፣ ከ 15 ሚሊዮን በላይ የእንግሊዝ ዜጎች እና ወደ 19 ሺህ የሚጠጉ የካናዳ ዜጐችን የግል መዛግብት ለምዝበራ የዳረገው ጥቃቱ ከማንነት ስርቆት ጋር በተገናኘ በታሪክ ከታዩት ግዙፍ የሳይበር ወንጀሎች አንዱ ያደርገዋል።
ጠላፊዎቹ እንደ የማህበራዊ ዋስትና ቁጥሮች፣ የዜጎችን የውልደት ቀን እና አድራሻዎች የመሳሰሉ ወሳኝ መረጃዎችን ማግኘት ችለዋል። ይህም በቢዝነስ ተቋማትና ደንበኞቻቸው ላይ ዘርፈ ብዙ ጉዳቶችን አስከትሏል፡፡ ይህ ጥቃት ድርጅቶች የደህንነት ስርዓታቸውን እንዲያጠብቁ ማንቂያ እንደሆናቸው ይነገራል፡፡
በአደገኛነቱ በአራተኛ ደረጃ ላይ የተቀመጠው የጥቅምት 2016ቱ የMirai Botnet Attack ነው፡፡

ከበይነ መረብ ጋር የተገናኙ መገልገያዎች ላይ ያነጣጠረ ጥቃት ሲሆን በድህረ-ገጾችና ንግዶች ላይ የተቃጣ ነበር፡፡
ጥቃት አድራሾቹ ጥቃቱን የሰነዘሩት በተበላሹ መሳሪያዎች አማካኝነት ሲሆን ተጠቃሚዎች ሙሉ ለሙሉ አገልግሎት እንዳያገኙ አድርጓል፡፡ ይህ ማለት ደግሞ ጥቃት አድራሾቹ ከየትኛውም የዓለም ክፍል ሆነው ሊያደርጉት ይችላሉ ማለት ነው፡፡ የMirai botnet ጥቃት ተጽዕኖው ዛሬም ድረስ እንዳልጠፋ የሚነገር ሲሆን ከኢንተርኔት ጋር የተገናኙ መሳሪያዎች ለሳይበር ጥቃት ምን ያህል ተጋላጭ ሊሆኑ እንደሚችሉ እንዲሁም የሳይበር ጥቃት አጥፊነትን አሳይቷል። በስተመጨረሻ ጥቃቱን መግታት የተቻለ ሲሆን ጥቃት አድራሾቹ በቁጥጥር ስር ውለው ወህኒ ተወርውረዋል፡፡
በአምስተኛ ደረጃ ላይ የተቀመጠው በጎርጎሮሳውያኑ 2014 የደረሰው የያሁ የሳይበር ጥቃት ነው፡፡ 500 ሚሊዮን አካውንቶች ላይ ያነጣጠረው ጥቃቱ መዘዙ ከሶስት ቢሊዮን ለሚልቁ የያሁ ተጠቃሚዎች ተርፏል፡፡

የተጠቃሚዎችን ስም፣ የልደት ቀን፣ አድራሻ እና ማለፊያ ቁጥር ያሉ መሰረታዊ ግላዊ መረጃዎች በጥቃት አድራሾቹ እጅ ውስጥ እንዲገባ በማድረግ በበይነ መረቡና በደንበኞቹ ላይ ከፍተኛ ጉዳትን አድርሷል፡፡ የያሁ የሳይበር ጥቃት በድርጅቱ ታሪክ ትልቁ የመረጃ ጥሰት ሲሆን ያደረሰው ጉዳት መጠነ ሰፊ ነበር፡፡
ሰርጎ ገቦቹ ጥቃቱን ያደረሱት በቀላሉ እንደነበር ኤፍ.ቢ.አይ በ2016 ይፋ ባደረገው መረጃ አስታውቋል፡፡ ይህን የታዘቡ የሳይበር ደህንነት ባለሙያዎች በሁሉም መስክ ያሉ የደህንነት ሰራተኞች በቂ የደህንነት ስልጠናዎችን ሊወስዱ ይገባል ሲሉ ምክረ ሃሳባቸውን ሰጥተዋል፡፡
ባለፈው የጎርጎሮሳውያኑ 2023 ዓለም በሳይበር ጥቃት ሳቢያ በዓመት ስምንት ትሪሊዮን ዶላር እንድታጣ እንዳደረጋት አለም አቀፍ የሳይበር ኢኮኖሚን እና የሳይበር ደህንነት እውነታዎች፣ አሀዞች ላይ የሚሰራው ሳይበር ሴኪዩሪቲ ቬንቸርስ የተሰኘው ኩባንያ መረጃ ያሳያል፡፡ በተያዘው ዓመት ቁጥሩ ወደ 9.5 ትሪሊየን ዶላር ከፍ እንደሚል ኩባንያው ገልጿል፡፡












