ኢትዮጵያ ለኮፕ 32 አዘጋጅነት እንድትመረጥ ባደረጓት የአረንጓዴ አሻራ መርሀ ግብር እና የአካባቢ ጥበቃ ስኬት ከተባበሩት መንግስታት ድረጅት ዓለም አቀፍ እውቅና ማግኘቷ ተገለጸ።
ኢትዮጵያ የአየር ንብረት ለውጥን ለመከላከል እና ኢኮኖሚዋን ለአረንጓዴ ልማት ምቹ ለማድረግ የምታከናውነው ተግባራዊ ስራ፣ በዓለም አቀፍ ደረጃ ተምሳሌት እንድትሆን ማስቻሉን የኮፕ 32 ፕሬዝዳንሲ ቡድን አባል እና የአረንጓዴ አሻራ መርሀ-ግብር አስተባባሪ ዶክተር አደፍርስ ወርቁ ገልጸዋል።

በኢትዮጵያ አረንጓዴ አሻራና አካባቢ ጥበቃ ጉዳዮች ላይ ሀሳባቸውን የሰጡት ዶክተር አደፍርስ፣ በዓለም አቀፍ ደረጃ ከሚወጡ የኢኮኖሚ፣ የጤና እና የኢነርጂ ፖሊሲዎች ሁሉ ቀዳሚውና ዋነኛው የአየር ንብረት ለውጥና የአካባቢ ጥበቃ ፖሊሲ መሆኑን አስረድተዋል።
ማንኛውም የልማት ፖሊሲ ተግባራዊ የሚሆነው መሬት ላይ እስከሆነ ድረስ፣ የአየር ንብረቱ ከተዛባ፣ መሬት ከተጎሳቆለና ውሃ ከተበከለ የሁሉንም ዘርፎች ስርዓት ስለሚያናጋ ለአካባቢ ጥበቃ ልዩ ትኩረት መስጠት የግድ መሆኑን አጽንኦት ሰጥተዋል።
ኢትዮጵያ የካርበን ልቀትን በመቀነስና ኢኮኖሚዋን አረንጓዴ በማድረግ ረገድ የሄደችበት ርቀት በአካባቢ ጥበቃው ዘርፍ ዓለም አቀፍ ማሳያ እንድትሆን አድርጓታል ያሉት ዶክተር አደፍርስ፤ የአረንጓዴ አሻራ መርሀ-ግብር ይህንን ስኬት በተጨባጭ ያሳየ መሆኑን ጠቁመዋል።
ለአብነትም ባለፈው የችግኝ ተከላ መርሀ-ግብር ብቻ ከ26 ሚሊዮን በላይ ዜጎች በነቂስ ወጥተው በመሳተፍ በአንድ ጀምበር 805 ሚሊዮን ችግኞችን መትከላቸውን ነው ያስታወሱት።
ይህ ሰፊ ህዝባዊ ንቅናቄና የተፈጥሮ ሀብት ጥበቃ ስራ አፈርንና ውሃን ከመጠበቅ ባለፈ ሀገሪቱ ከካርበን ንግድ ተጠቃሚ እንድትሆን መሰረት የሚጥል ትልቅ ሀገራዊ አቅም መሆኑ ተመላክቷል።
ሀገሪቱ የአካባቢ ጥበቃ ፖሊሲዎችን ከማውጣት ባለፈ መሬት ላይ አውርዳ በተግባር በማረጋገጧ፣ በተባበሩት መንግስታት ድርጅት እና በዓለም የምግብና እርሻ ድርጅት (FAO) የአየር ንብረት ለውጥ መከላከል ተግባሪ ሞዴል ሀገር በመባል እውቅና ማግኘቷን አስተባባሪው አስታውቀዋል።
ኢትዮጵያ የ32ኛውን የሀገራት የአየር ንብረት ለውጥ ጉባኤ እንድታዘጋጅ መመረጧም የዚሁ ዓለም አቀፍ እውቅናና የመሪነት ሚናዋ አንዱ አካል ተደርጎ የሚወሰድ መሆኑን የኮፕ 32 ፕሬዝዳንሲ ቡድን አባል የሆኑት ዶክተር አደፍርስ አንስተዋል።
የተጀመረውን የአረንጓዴ ልማትና የካርበን ቅነሳ ስኬት ዘላቂ ለማድረግ የሁሉም ዜጋ ተሳትፎ ወሳኝ መሆኑን ጠቁመው ፤ ከሊቅ እስከ ደቂቅ ያለውን እያንዳንዱን የህብረተሰብ ክፍል በማነሳሳት በአረንጓዴ አሻራና በአፈር ጥበቃ ስራዎች ላይ በንቃት እንዲሳተፍ ማድረግ እንደሚገባ አሳስበዋል።
ይህ ቀጣይነት ያለው ጥረት የኢትዮጵያን የተፈጥሮ ሀብት ከመጠበቅ ባለፈ ለኮፕ 32 ጉባኤ የምታቀርበውን ተሞክሮ ይበልጥ የሚያጎላ እና ከአረንጓዴ ኢኮኖሚው የሚገኘውን ዘርፈ ብዙ ጥቅም የሚያረጋግጥ ይሆናል ብለዋል።
በ ታደለ ገበየሁ




