በአማራ ክልል የውሃ ሀብቶችን ለዓሳ ምርት በማዋል የአርሶ አደሩን ተጠቃሚነትና የስርዓተ ምግብ ችግር ለማሻሻል ትኩረት መደረጉን የእንስሳት እና ዓሳ ሀብት ቢሮ ኃላፊ ጋሻው ሙጨ (ዶ/ር) ገለጹ።
የቢሮ ኃላፊው እንደገለጹት፤ በክልሉ በርካታ የተፈጥሮ ሃይቆች፣ 28 የሰው ሰራሽ ግድቦችና በርካታ በአርሶ አደሩ ማሳ የተዘጋጁ ኮሬዎች ይገኛሉ።
በበጀት ዓመቱ ክልሉ ያለውን እምቅ የውሃ ጸጋ በመጠቀም የዓሳ ልማት ዘርፍን በማስፋፋት ተጨማሪ ሃብትና የስራ እድል ለመፍጠር ግብ ተይዞ ወደ ስራ መገባቱን ገልጸዋል።
በ2019 በጀት ዓመት 50 ሺህ 200 ቶን ለማምረት ታቅዶ በተደረገ ጥረት በመጀመሪያው ሩብ ዓመት ብቻ 8 ሺህ 786 ቶን ዓሳ በማምረት ለገበያ ማቅረብ መቻሉን ተናግረዋል።

የዓሳ እርባታና ልማት ስራውን በዘመናዊ መንገድ ለማከናወንም የምርምር ማዕከላትን በማጠናከር እስካሁን 288 ሺህ 800 የሚሆን የዓሳ ጫጩት ማሰራጨት መቻሉን አስረድተዋል።
ክልሉ በዓሳ ልማት ዘርፍ ያለውን እምቅ አቅም በመጠቀም ለ25 ሺህ 275 ዜጎች የስራ እድል ለመፍጠር ታቅዶ እስካሁን አራት ሺህ 257 ዜጎችን ተጠቃሚ ማድረግ ተችሏል ብለዋል።
ይህም ሁሉንም የውሃ አማራጮች በመጠቀም ዓሳን በጥራትና በብዛት አምርቶ በማቅረብ አርሶ አደሩን ተጠቃሚ ለማድረግ እና የስርዓተ ምግብ ችግርን ለመቅረፍ እየተሰራ ለመሆኑ ማሳያ ነው ብለዋል።
በማዕከላዊ ጎንደር ዞን የእንስሳት እና ዓሳ ሀብት ልማት መምሪያ ኃላፊ ምሥጋናው ታክለ (ዶ/ር) እንደገለጹት፤ በዞኑ የጣና ተፋሰስ የዓሳ ሀብት ልማት በስፋት እየተከናወነ ይገኛል ብለዋል።
ወጣቶችንና ባለሀብቶችን በክላስተር በማደራጀት፣ የቦታ፣ የብድር እና የሀብት ድጋፍ በማመቻቸት ዘመናዊ የዓሳ ልማት ትኩረት ተሰጥቶ እየተሰራበት መሆኑን ገልጸዋል።
በተጠናቀቀው በጀት ዓመት በዓሳ ልማት ዘርፍ ለ20 ሺህ 280 ዜጎች የስራ እድል መፍጠር መቻሉን ከቢሮው የተገኘው መረጃ ያመላክታል።
(ኢዜአ)












