በ-ፍቅረሚካኤል ዘየደ
ይህ ሰው ኢትዮጵያን እውነተኛዋ የአባቶቻችን ምድር ሲል ገልጿታል፡፡የነጮችን የባርነት መንገድ በመቃወምም ፈር ቀዳጅ ነው፡፡

ስመ ገናናነቱ በተግባር ተገልጦ ለአፍሪካውያን የነጻነት ተጋድሎም በር ከፋች ሆኗል፡፡ “በራስ መተማመን ካለህ ከመወዳደርህ በፊት አሸንፈሃል” የሚለው ብሒሉ በሕይወት ስንክሳር ለሚገጥመው ውጣ ውረድ እጅግ ጠቃሚ ምክር ነው፡፡
የጥቁሮች ንቅናቄ መስራችና ፕሬዝዳንት፣ የሰብዓዊ መብት ተሟጋች ፖለቲከኛ እና ጋዜጠኛው – ማርክስ ጋርቬይ ጥቁሮች በነጮች ሰብዓዊ መብታቸውን ተነጥቀው፤ ከሰው ተራ ዝቅ ብለው እንደ ቁስ ወደ አውሮፓና አሜሪካ ሲላኩ ብሎም በገዛ ሀገራቸውና ቀዬአቸው እንደ ሁለተኛ ዜጋ በሚታዩበት ወቅት በድንግዝግዙ መሐል ብቅ ያለ ማሕቶት ሆነ፡፡
ማርክስ ጋርቬይ በራስ መተማመኑ የሚደንቅ! ርዕዩ ነጮች ሊደርሱበት ከሚችለው ሀሳብ የሚርቅ! የሚልቅ! ተሟጋች ሕሊናን የተላበሰ የባርነት ጨለማን መግፈፍ የቻለ! መልካም ስብዕና የተቸረው ሰው ነው፡፡ ጋርቬይ ተስፋ ሩቅ በሆነበት ዘመን አፍሪካውያን የነጻነትን ጮራ የሚያሳያቸው በሚሹበት ወቅት ብቅ ያለ ቀንዲል ነው፡፡
የተወለደው ጃማይካ ነው፡፡ እንደ አውሮፓውያኑ አቆጣጠር 1887 ነሐሴ 17 ቀን፡፡ ትምህርቱን እስከ 14 ዓመቱ ድረስ ጃማይካ ባለ ትምህርት ቤት ውስጥ ተከታትሏል፡፡
የጃማይካ የፖለቲካ ተሟጋች፣ አሳታሚ፣ ጋዜጠኛ፣ ሥራ ፈጣሪና ተናጋሪው ጋርቬይ ራሱን ጊዜያዊ የአፍሪካ ፕሬዝዳንት ብሎ ያወጀና የ (UNIA-ACL በተለምዶ UNIA በመባል የሚታወቀው) ድርጅት መስራችና የመጀመሪያ ፕሬዝዳንትም ነበር ፡፡
ጋርቬይ ጥቁርነት የቆዳ ቀለም እንጂ የመገለያና የታናሽነት ምልክት አይደለም በሚለው መርሑ በብዙዎች ተቀባይነት ቢያገኝም፤ ለነጮቹ ግን ራስ ምታት ነበርና ከፊት በወዳጅ ከኋላ በጠላት የተከበበ ነበር፡፡ ባለፈባቸው የትግል ዓመታትም ግዞትን ሳይፈራ ለእስር ሳይደነግጥ ኖሯል፡፡ ማርክስ ጋርቬይ ፓን አፍሪካኒዝምን በማቀንቀን ለአፍሪካና ለአፍሪካውያን ድምፅ ሆኗል። የነፃነት ተምሳሌት እውነተኛዋ የአባቶቻችን ምድር የሚላትን ኢትዮጵያን የትግሉ እና የሕልሙ ጥንካሬ አድርጓታል፡፡ የኢትዮጵያን በጣልያን መወረርም በማውገዝ ተቃውሞውን ያሰማ ሰው ነው፡፡ ይህ ሰው በ52 ዓመቱ እንደአውሮፓውያኑ 1940 በዛሬው ዕለት ነበር ሕልፈተ ሕይወቱ የተሰማው፡፡
እኛም የጥቁሮች ባለውለታ በመሆኑ ታሪኩን አስታወስናችሁ!












