NBC Ethiopia
May 28, 2025
በኢፌዴሪ የህዝብ ተወካዮች ምክር ቤት ውስጥ የተገነባው የስማርት ክፍል ኮሚዩኒኬሽን ፕሮጀክት ተመርቋል። በምክር ቤቱ የተገነባው ስማርት ክፍል አመራር አካላት በቪድዮ ኮንፈረንስ ውይይት በማድረግ ፈጣን በሆነ ሁኔታ ውሳኔ ለመስጠት፣ ችግሮችን ለመፍታት፣ ህብረተሰቡን ለማዳመጥ የሚጠቅምና እንደ ሀገር እየገነባን ያለውን የዲሞክራሲ ስርዓት ለማጠናከር ትልቅ ሚና እንደሚጫወት ተገልጿል።
በምረቃ ስነ ስርዓቱ ላይ የተገኙት የሰው ሀብት ልማት ስራ ስምሪትና ቴክኖሎጂ ጉዳዮች ቋሚ ኮሚቴ ሰብሳቢ ነገሪ ሌንጮ (ዶ/ር) እንዳሉት፣ የቴክኖሎጂው እውቀት ከቦታ ቦታ በአግባቡ እንዲንሸራሸር ርቀትን በማሳጠር ሰዎች በብዙ ኪሎ ሜትሮች ተራርቀው ባሉበት ሀገራዊ ጉዳዮችን በጋራ ለመወያየትና ውሳኔ ለመስጠት እንዲሁም እውቀትን ለማስተላለፍ እንደሚጠቅም ገልፀዋል።

አያይዘውም ቴክኖሎጂው ከኢኮኖሚ ልማት በተጨማሪም ለትምህርት ጥራት፣ በጤናው ዘርፍም የተሻለ ልምድና እውቀት ያላቸው ሀኪሞች ከሌሎች ጋር ግኝኙነት በማድረግ እውቀትና ልምዳቸውን የሚያስተላልፉበት፣ ችግሮችን የሚፈቱበት ፕላት ፎርም ሊሆን እንደሚችል ጠቁመዋል። መሰረተ ልማቱን ተደራሽ በተደረገባቸው አካባቢዎች ተገቢውን አገልግሎት እንዲሰጥ አስፈላጊውን የሰው ኃይል ማሟላት፣ በፋይናንስ መደገፍ መጠቀም እንዲሁም መጠበቅና ለወደፊቱም ተደራሽ ባልተደረገባቸው አካባቢዎች ተደራሽ ማድረግ እንደሚያስፈልግ ነገሪ (ዶ/ር) አስገንዝበዋል።
የኢኖኖቬሽን እና ቴክኖሎጂ ሚኒስትር በለጠ ሞላ (ዶ/ር) ከቤንሻንጉል ጉምዝ ርዕሰ መዲና አሶሳ በተገነባው የስማርት ክፍል በመገኘት የምርቃ ስነ ስርዓቱን ከምክር ቤቱ ጋር በጋራ ያከናወኑ ሲሆን፣ ሚኒስቴር መስሪያ ቤቱ ከዚህ በፊት 5 ያህል ስማርት ክፍሎችን ገንብቶ ለተቋማት ማስረከቡን አስታውሰዋል። አያይዘውም በዛሬው ዕለት በ10 የተመረጡ የፌዴራል ተቋማት፣ በ12 በክልሎች ዋና ከተማ በተለይ የክልል ርዕሰ መስተዳድሮች ጽ/ቤትና በ2 የከተማ መስተዳደሮች በድምሩ 24 ስማርት ኮሚዩኒኬሽን ክፍሎች ተገንብተው መመረቃቸውን ጠቁመዋል።

ቴክኖሎጂው የዲጅታል ኢኮኖሚውን ለማፋጠን ከፍተኛ አስተዋፅኦ እንደሚያደርግ ጠቁመው ፕሮጀክቱ ጥራቱን በጠበቀ ሁኔታ፣ ሁሉም አስፈላጊ የቴክኖሎጂ ግብአቶች የተሟሉለት፣ በአጭር ጊዜ ያለቀና የተሳካ ፕሮጀክት መሆኑን ገልፀዋል። ዲጅታል ኢትዮጵያ 2025 ስትራቴጂ ካስቀመጣቸው ግቦች አንዱ የዲጅታል ኢኮኖሚን ማፋጠን፣ አስፈላጊ መሰረተ ልማቶች ማሟላትና መገንባት በመሆኑ ከነዚህ መሰረተ ልማቶች አንዱ የሆነው የስማርት ኮሚዩኒኬሽን መሆኑንና በተለያዩ ቦታዎች የመገንባት ስራ እየተሰራ መሆኑን ጠቁመዋል።

የስማርት ኮሚዩኒኬሽን ክፍል ምቹ የስራ አካባቢን ከመፍጠር አንፃር የተፋጠነ፣ የተማከለ የስራ ግንኙነት እንዲፈጠር ያስችላል፣ የጀመርነው ስራ በቀጣይ እየሰፋ ይሄዳል፣ ፕሮጀክቱ ውጤታማ እንዲሆን ለተሳተፉ እንዲሁም የዐለም ባንክ ፋይናንስ በማድረጉም ምስጋና እናቀርባለን ብለዋል የኢኖቬሽንና ቴክኖሎጂ ሚኒስቴር ሚኒስትር የተከበሩ በለጠ ሞላ (ዶ/ር) ቴክኖሎጂው በኢኖቬሽንና የቴክኖሎጂ ሚኒስትር አማካኝነት በአይ ኢ ኔትወርክ ሶልዮሽንስ መገንባቱ ተገልጿል።
(የህዝብ ተወካዮች ምክር ቤት)












