አለማችን በየእለቱ አስቂኝ፤ አሳዛኝ ብሎ አስገራሚ ሁነቶችን ታስተናግዳለች፤ እነዚህን ሁነቶች ደግሞ ሰብስቦ ለአለም እወቁልኝ የሚሉ ዘመን አመጣሽ የቴክኖሎጂ ወሬ ነጋሪዎች በርካታ ናቸው፡፡
ለዛሬ ከነዚህ የመረጃ ቋቶች ከሰበሰቧቸው ሳምንታዊ አስገራሚ ሁነቶች መካከል ጥቂቶቹን እንንገራችሁ፡፡
የ49 አመቷ ጎልማሳ አካል ጉዳተኛ በመምሰል ረብጣ ዶላሮችን ስትሰበስብ ነበር ሲል ኦዲቲ ሴንትራል አስነብቧል፡፡ ወደው አይስቁ!

ሳራ ሞሪስ የተባለችው ይህቺ እንግሊዛዊት ከግንቦት 2019 ጀምሮ እስከ 2022 ድረስ በሀገሪቱ መንቀሳቀስ ለማይችሉ አካል ጉዳተኞች የሚሰጠውን ወርሀዊ ድጋፍ እየተቀበለች በሀገሪቱ የተለያዩ ሩጫ መድረኮች ላይ ስትሳተፍ ነበር ይላል ዘገባው፡፡
ግለሰቧ ወደ ተቋሙ እርዳታን ለማግኘት ስትል ከአልጋ መንቀሳቀስ እንደማትችል፤ ያለእርዳታ መታጠብ መመገብ ሆነ ወደ መጸዳጅ ማቅናት እንደማትችል መድሀኒትም በሰው ድጋፍ እንደምትወስድ በመናገር በወር 2ሺ 292 ዩሮ እንዲሰጣት አድርጋለች፡፡ሳይሰሩ ገንዘብ ለማግኘት ሲባል በራስ ላይ እንዲህ ማሟረትን ምን ይታል?
የሌባ አይነ ደረቅ እንዲሉ ድጋፉን ሰትተዋት ዞር ባሉ ማግስት ለሩጫ ባላት ታላቅ ፍቅር በ5ሺ እና በ10ሺ ሜትር ኪሎ ሜትሮች ሩጫ በመሳተፍ በጥቅሉ ከ 73 ያላነሱ ውድድሮች ላይ በነዚህ አመታት ተሳትፋለች፡፡
ይህ ሁሉ ሁነት ሲሆን አንዳችም ሰው ያልነቃባት ሳራ በአንድ የሩጫ ውድድር ላይ ሳለች የሚያሳይ ምስል በፌስቡክ ትስስር ገፅ መለቀቁን ተከትሎ የእስከዛሬ ድርጊቷ እንዲታወቅባት ሆኗል፡፡
ወትሮውንም ለሩጫ ያላትን ፍቅር የማትደብቀው ሳራ እስከዛሬ እያጭበረበረች ትቀበል እንደነበር አምናለች፤ ድርጅቱም ሁነቱን በመቃወም በነዚህ ሁሉ አመታት አንድ እርምጃ መሄድ እንኳን የማይችልን ሰው ጥቅም በማታለል ስታገኝ ነበር ሲል ከሷታል፡፡
ሌላኛው አስገራሚ መረጃችን ደግሞ በሩሲያ ለዘጠኝ አመታት በህመም ሲሰቃይ የነበረ ግለሰብ በመጨረሻም የህመሙ ምክንያት ታወቀለት ይለናል፡፡ስሙ ያልተገለጸው የ53 አመቱ ሩሲያዊ ባለፉት ዘጠኝ አመታት በቀኝ ደረቱ አካባቢ የመውጋት አንዳንዴም ከፍተኛ ህመም ቢሰቃይም ወደ ህክምና ተቋም ሄዶ ለመመርመር አስቦ አያውቅም ነበር ተብሏል፡፡
ግለሰቡ ህመሙ ሲበረታበት በአንድ እለት ወደ ሆስፒታል በማቅናት በታዘዘለት የሲቲስካን ምርመራ በጉበቱ ቀኝ ክፍል የተጣበቀ ስለታም ነገር እንደሚታይ በመግለጽ ዶክተሮቹ ምን ሊሆን እንደሚችል ቢጠይቁትም ፈፅሞ ሊያውቅ እንደማይችል ተናግሯል፡፡
በመጨረሻም በተደረገለት ቀዶ ህክምና በጉበቱ ቀኝ ክፍል 9ሴንቲ ሜትር የሚረዝም የመስታውት ቁራጭ ሊያስወግዱለት ችለዋል፡፡
ትረፊ ያለት ነፍስ እንዲሉ ከ9አመታት በኋላ የህመሙ ምክንያት ስለመገኘቱ ከወጣለት የጠርሙስ ቁራጭ ጋር በማድረግ በማህበራዊ ሚዲያ በማጋራት በበርካቶች አነጋጋሪ ሆኗል፡፡
አልበላም አልጠጣም ብዬ እንዲል የሀገሬ ሰው ጃፓናዊው ግለሰብ አልበላም አልጠጣም በማለት ላለፉት 21 አመታታ ያጠራቀምኩት ገንዘብ በ45 አመቴ ጡረታ እንድወጣ ረድቶኛል ይለናል፡፡

ግለሰቡ ባለፉት 2 አስርት አመታት ፍላጎቶቹን ፍጹም ገድቦ 130 ሚሊየን የን ወይንም 640ሺ ዶላር ማጠራቀሙ በማህበራዊ ሚዲያዎች የበርካቶች መነጋገሪያ ሆኗል፡፡
FIRE (Financial Independence, Retire Early) ወይንም የገንዘብ ነጻነትን በጊዜ በማስፈን ጡረታ መውጣት በውጪ ሀገራት በይበልጥ እየተለመደ የመጣ ሁነት ሲሆን የዚህን ግለሰብ ድርጊት ለየት ያደረገው 21 አመታት መሰረታዊ ፍላጎቶቹን ሁሉ ገድቦ መኖሩ ነው፡፡
በየአመቱ ከ32ሺ በላይ ዶላር ደሞዝ ያግኝ እንጂ በቀን 1ጊዜ የተቀቀለ ሩዝ እና እራቱን ለስላሳ መጠጥ በመጠጣት ገንዘብ ማጠራቀሙ ተነግሯል፡፡
ግለሰቡ ርካሽ ልብሶች እና ጫማዎችን በመጫማት፤ ለመዝናናት ደግሞ የቴሌቪዥን ወንጀል ፕሮግራሞችን በመመልከት ፤ ይባስ ብሎ ደግሞ በክረምት ወቅቶች እንኳን በቤቴ ማሞቂያ ሳይኖር ነው ያሳለፍኩት ሲል ይገልጻል፡፡ የርሱን ጽሁፍ በማህበራዊ ሚዲያ የተመለከቱ ሁሉ ላይ ግርምትን ጭሯል፡፡ አልሞት ባይ ተጋዳይ ማለት እዲህ ያለውን ነው፡፡ ነገን አስቦ ዛሬ አለመኖር
በ-የአብስራ ሚሊዮን












